Dili ba mo mahadlok?

Tan-awa, wala g’yud ko masayop sa akong giingon nga human ituboy ni Presidente Aquino si DILG Secretary Mar Roxas nga maoy iyang kandidato pagka presidente sa eleksyon sunod tuig motidlum ang popularity rating ni Vice President Jejomar Binay.

Base sa report nga nadungog nako sa mga balita sa radio, mitidlum g’yud ang rating ni Binay ug mianam-anam pagsaka ang kang Roxas. Kaniadto gud, ang mga tawo naghuna-huna pa man kun modayon ba kaha si Roxas sa paglansar pagka presidente.

Bana-bana nako, nakasabot na g’yud ang mga tawo nga sa tanang mga tawo nga nagplano paglansar pagka presidente, si Roxas ra ang maayo kanila ug adunay eksperyensya pagdumala sa kagamhanan.

Aw, si Binay makamao ‘sab apan angay kita nga magpanagana kay tiaw mo, wala pa gayud niya tubaga ang mga pasangil nga nakahimo siya og graft and corruption diha nga mayor pa siya sa Makati City. Bisan asa ko mangutana, walay ganahan ni Binay kay kuyawan.

Unya si Senador Grace Poe dili ikalimod nga popular ‘sab, apan ang nakadaot kay ang iyang kasinatian sa kagamhanan duha pa lang ka tuig nga nahimong senador. Wala pa siya makagunit og mga executive functions.

Malagmit nga ang mahitabo kun simbako mahimo nga presidente si Grace Poe, usa ra siya ka “dummy president” unya ang iyang mga suod nga opisyal maoy magsige og himo’g mga sugyot nga ipabuhat nila ni Poe.

Unya ganahan mo niana? Mao kana nga sa akong pagtimbang-timbang, si Mar Roxas angayan gayud nga maoy himuong presidente kay daghan na kaayo siya og kasinatian.

Nakapahimulos ang katawhan, apil na ko, sa iyang gimugna nga balaod (Cheaper Medicine Law) nga nakapabarato sa mga maintenance drugs. Ang mga call center agents nakakita og maayo nga trabaho tungod ni Roxas ug daghan pa nga proyekto.

Apan ang labaw sa tanan mao nga si Roxas wala gayud malambigit og mga binuang sama sa kurapsyon bisan og dugay na kaayo siya nga nagtrabaho sa kagamhanan.

* * *

Ang mga iladong banay diha sa Mandaue City nakasaad na man diay og suporta ni Konsehal Lolypop Ouano-Dizon. Kini sama sa banay’ng Mendoza kang kansang sakop sa pamilya akong nahinabi.

Nahinabi na diay kuno nila si Lolypop ug gisaaran nga mao kini ang suportahan sa pagka mayor.

Ang kataw-anan kay si Kongresista Luigi Quisumbing mihangyo ‘sab diay nila og suporta apan ila na lang gibalibaran.

Kun mao ni ang dagan, wala gihapon ko masayop sa akong pangagpas nga imusmos ni Lolypop sa kapildehan si Luigi kun modayon kini pagdagan pagka mayor sa eleksyon karong sunod tuig.

Apan akong awhagon si Luigi nga dili mosibog.