Daghan nato ang buot mamahimong himsog mao nga mamili gyud ta sa atong kaunon. Kini tungod kay di lang ni mahitungod sa lamiang pagkaon kondili usab sa sustansiya nga makapataas sa atong kinabuhi. Kun kini ang atong kinaiya nga gipakita diha sa atong pag-atiman sa atong lawas nga madunot ingon ini ba usab kaha ang atong gipakitang kakugi sa pag-atiman sa atong kalag? Ang atong kinabuhing espirituhanon nagkinahanglan usab og nourishment. Ug ato lamang kining makab-ot diha sa atong pakig-ambit sa langitnong pagkaon nga mao ang lawas ug dugo sa atong Ginoong Jesus. Sa matag higayon nga kita mokalawat nagpasabot kini dili lang sa pag-ambit sa espirituhanong kalig-on kondili ang pag-awat usab sa kinabuhi sa atong gikalawat nga way lain kondili ang atong Ginoong Jesus. Iyang gihatag dili lang ang kinabuhi hinunoa iyang gihatag ang Kinabuhing dayon.