Feeling presidente na!

Nangasuko ang mga sakop sa media sa taras nga gipakita ni DILG Secretary Mar Roxas atol sa iyang pagbisita dinhi sa Sugbo niadtong adlaw’ng Martes.

Tataw na kaayo nga nangulitawo si Mar sa nagkadaiya’ng sektor alang sa pangandoy niya nga mahimo’ng presidente sa nasud sa tuig 2016.

Buntag pa lang nagsunod na g’yud intawon ang mga sakop sa media sa iyang mga gitambongan nga kalihukan sa pamasin nga makasingit og interview kabahin sa iyang pagbisita ug sa laing mga issue.

Apan abtik kaayo ang iyang mga alipores nga feeling "PSG" na pagpakgang sa mga gusto'ng mangutana. Sa akong na-experience didto sa Kapitolyo, kay ako man ang nag-cover, halos na lang dili moyanghag sa mga tigbalita si Roxas diha nga gi-ambush interview.

Ngano nga mahadlok man siya'ng pangutan-on sa mga isyu nga angayan niya nga tubagon? Sama sa isyu nga wala paghinayon sa paghatag og pasidungog sa mga sakop sa SAF 44 atol sa PNP Day Celebration, ilabi na sa Sugboanong si PO2 Romeo Cempron nga wala g’yud natukbil ang issue.

Basin gipakagamay lang ni Mar ang Cebu media nga dili angayang usikan sa iyang laway sa pagtubag. Wala pa gani ang pormal nga pagduso sa Certificate of Candidacy apan mura’g "unreachable star" na man ang manok ni PNoy.

Kun dili usbon sa Team Roxas ang ilang estratehiya basin kutob lang sila sa "impossible dream" sa 2016. Hahay, wala’y kalainan si Mar sa iyang mga kaatbang kung kaartehan sa media interview ang hisgotan!