Nindot ang tumong sa balaod nga dakpon na g’yud ang mopasakay og gagmay’ng bata sa mga motorsiklo, ilabi na kun wala kini magsul-ob og crash helmet.
Sigurado nga daghan ang dili gihapon motuman sa lagda nga gilatid sa Republic Act 10666 nga gipirmahan ni Presidente Aquino sa miagi’ng semana.
Ipatuman kaha ni sa mga road law enforcers? Dili ba kaha kining mao nga balaod madugang lang sa mga balaod nga gipasagdan ra sa Land Transportation Office?
Kaniadto, ang balaod nagdili ra sa pagpasakay og mga bata sa motorsiklo kun kini ubos sa 7-anyos ang edad. Karon, gitataw nga kun ang bata makagakus na sa hawakan sa nagmaneho sa motor, unya magsul-ob og helmet, mahimo ra siya nga makasakay.
Sigurado g’yud hinuon nga ibaliwala ra kining maong balaod sa mga ginikanan nga motorsiklo ra intawon ang sakyanan ug mangyawat nga makadaginot og kuwarta mao nga irisgo na lang ang ilang gagmay’ng anak pagpasakay sa motor.
Daghang ginikanan nga sila ra ang nagsul-ob og helmet samtang nagsakay sa motorsiklo. Kun imo g’yud nga sabton pag-ayo susama ra nga kining mao nga mga ginikanan mosugot nga mabuak ang ulo sa ilang anak kun matumba, basta sila maluwas.
Ang pagsul-ob og crash helmet dili g’yud hinuon makaluwas sa kamatayon kun maligsan g’yud ang nagmotor, apan kun aksidente lang nga malamba, dili kaayo magrabehan kun may helmet.
Bisan pa og ang multa niining bag-ong balaod nagsukad sa P3 mil ug moabot pa ngadto sa P10 mil, apan sigurado nga kini ibaliwala ra sa katawhan kun makita nila nga pasagdan ra sa mga enforcers ang pagpatuman.