Ang pag-ila sa yuta (2)

Ang ulahi’ng gihisgutan nato sa miagi , mao ang laing paagi gawas sa ‘PH tester kit’, mahimo sad ang suka o ang ‘baking soda’, ang gamiton sa pag-ila sa yuta kun kini ba acidic o ‘alkaline’. Busa atong ipadayon ang pagtuki niini;

* ‘Baking soda’ – sama sa suka magkuha’g yuta nga sinagolan og  ‘distilled water’ nga himoo’ng lapok. Dayon buboan og ‘baking soda’ nga kun mobula ni pag-ayo, timailhan ni sa yuta nga ‘acidic’.

Managlahi ang kinaiya sa tanom, sa kondisyon diin sila komportble sa ilang pagtubo, busa mag-obserbar ta sa lihok sa mga gitanom. Kun pananglitan nakatanom ka na unya permi lang di mabuhi, imo usab hataga’g konsiderasyon ang kondisyon kun nabantang ba sa adlaw. Makapahimsog sa tanom ang adlaw.

Walay kalainan ang tanom sa tawo, mogamot kini’ng mamunga ug mosanay nga may kinabuhi. Ato sila’ng amumahon ug hinabion, kay may komunikasyon sila sa tawo nga mabatyagan ini kun giunsa nato sila gigalam o gihatagan sa husto’ng pag-atiman. Gikan sa tanom ang gihanggap nato nga ‘oxygen’.

Sa pagtanom, haytek na sab kay duna’y himan o gadget nga ‘plant sensor’, barato ra, tingali naa na ni baligya sa mga agri-stores, tag $18 lang. Imo kini i-ugbok sa yuta tibuok adlaw, nga nakakonek pinaagi sa USB ngadto sa imong kompyuter. Marehistro ang mga impormasyon sa yuta ug sa pagpananom.

Unya mohatag pa’g rekomendasyon kun unsay angay nga itanom. Busa, dasiga ang kaugalingon, nga puhon mahimo kita’ng eksperto  niini, sa abag sa moderno’ng teknolohiya. Makaseguro kita’ng molambo ini’ng aspetoha kun nakapukos nga maedukar kabahin sa yuta maingon man sa itanom.