Ang pag-ila sa yuta (1)

Kinahanglan makat-on gayud kita, kun unsaon pag-ila sa yuta, kay may panahon ra nga ato kini magamit puhon. Unya makatabang pa kita sa pagiya sa uban nga mahiligon sa pagtanom, sa angay o haum nga yuta'ng katamnan.

Angay gyud sab nga kun may yuta pa kita sa nataran, mag-eksperimento nga ilhon ang matang niini, aron maka-ideya ka kun unsay itanom. Ang pagsuheto niini, dako ni'g tabang nga madasig ka pagpananom bisan lang pinaagi sa ka-ang nga ipamitay o idayan sa imong palibot. Malipay ka ini'ng magsud-    ong

Og malingaw ka pa sa kadaghan sa bulak o sa mga bunga gumikan kay maantigo ka na moila sa kabililhon sa yuta nga mopabuhi sa tanom nga himsog.

Haytek na karon nga di hasol sa pagkat-on kay may paagi kini nga lakturon lang.

Anaa sa mga botika o sa agri-stores, adunay gipamaligya nga ginganlan og 'PH tester kit' nga may mabasa ka'ng lebel o pointer sa numero. Imo lang ni'ng i-ugbok sa yuta. Unya kun matunong sa 6-7, neutral o normal kana nga klase sa yuta. Kun momenus niini, asidik na'ng klaseha apan kun molabaw niini, alkalina (alkaline) ang yuta. Mag-obserbar ka sa tanom, kun unsay ampay ini'ng klase.

Aduna pa'y lain paagi kun walay 'PH tester kit', mahimo na ang suka o ang 'baking soda' maoy gamiton, nga ingon niini ang buhaton;….

* Suka - magkuha ka'g yuta ( ¼ sa tasa ) nga sagola'g 'distilled water', unya lapoka. Ighuman, butangan og suka ang ibabaw. Kun mobula kini'g pino, unya mangapusoy o mawala dayon, kini ang klase sa yuta nga 'alkaline' (may pagkainit apan dili asidic,  sagad mao ni ampay sa mga tanom kay komportable kini sa ilang pagtubo nga maghata'g dagha'ng bulak ug bunga).