Wa’y kredibilidad mobatbat og SONA

Gibukbok sa mga netizens sa social media ang SONA ni Bise Presidente Jejomar Binay, ug nakitang wala kini “impact” sa katawhan. Samot na nga gitubag kini og usa lang ka linya sa Malacañang, “mipakpak siya’g lima ka tuig sa karon palpak” na nga pamunoan ni Aquino.

Nakasabot na ang mga Filipino nga panimalos ra g’yud ning kang Binay. Apan nawala ang iyang angay nga mobuhat og SONA kay igo ra g’yud siya nga nangita og buslot sa gobiyerno diin siya nahimo nga parte bali’g lima ka tuig.

Ug sa wala pa mobuwag si Binay sa administrasyon, utro pud siya nga naghuwat nga siya ang bendisyonan nga mag-presidente sa 2016. Kay wala man siya pilia ni Noynoy, gi-atake na niya kini daw iro nga mibugno sa iyang amo.

Makumparar nga ang SONA ni Presidente Aquino pulos naghisgot og positibo, samtang kang Binay pulos naghisgot og negatibo.

Kun nagtuo si Binay nga magamit niya ang iyang kunohay true SONA, nasayop siya, kay sa iyang paghisgot sa mga isyu sama sa DAP ug uban pa, nahibaw-an na sa mga tawo, apan wala siya’y kredibilidad mohisgot niini kay kontra niya si kalihim Mar Roxas, ug daghang isyu nga pagpangawkaw nga iyang giatubang ug sa iyang pamilya.

* * *

Ang mayor ni Binay dinhi sa siyudad sa Sugbo nga si Mike Rama wala na usab kahimut-i sa mga Sugboanon tungod kay nanggukod kini sa mga lugar nga “identified” sa iyang kontra nga si Tomas Osmeña.

Iyang gipa-demolish og dalidali ang kabalayan sa Doña Pepang Cemetery nga wala gani siya gihatag nga relocation site sa mga namuyo. Dili ba klaro kini nga kalapasan sa “human rights” sa mga residente kang kansang kabalayan gipang-demolish?

Mao usab kini sa Citilink Terminal sa mga V-Hire sa Natalio Bacalso Ave. nga gipasirad-an ug gibalhin nga wala’y notisya. Anaa karon gipa-initan lang ang mga drayber ug pasahero kilid sa karaang Compania Maritima.

Unsa may nasulod sa utok niining Mike nga hilig man mamungkag, sama sa iyang pagbungkag sa Doña Penang, Citilink,ug sa Cebu City Medical Center nga karon mura na lang kadak-a og klinika?

Mao-mao ra g’yud silang Binay ug Mike. Kaniadtong bise presidente pa nagsige og dayeg kang Noynoy sama kang Mike nga bise mayor pa ni Tomas, wala g’yuy ikaestorya.

Karon nga kontra na si Binay mamaak na kining Noynoy, mao usab kang Mike nga mamungkag na sa mga lugar nga makonektar kang Tomas.

Hinuon, kinsa may magkuyog sa 2016? Sila ra g’yud ni Binay ug Mike.