Pulos nangiwit
Sa way pagtuki sa ilang katakos ug kaligdong, o kakuwang sa giisip nga labing mahinungdanong mga mithi sa mosunod nga pangu sa Republika sa Pilipinas, nagbayloay og luna silang Bise Presidente Jejomar Binay ug Interior Secretary Mar Roxas karon kun itandi sa ilang nahimutangan sa kampanya sa niaging piniliay’ng presidensiyal sa 2010.
Gitumbok ni Binay ang kabiya ni Roxas sa nasudnong surveys sa Social Weather Stations (SWS) ug Pulse Asia sa nagpadayon niyang kamasaligon bisan sa pagtuboy ni Presidente Noynoy Aquino kang Roxas niadtong Biyernes. Ang nataligam-an ni Binay mao nga ang pagpangiwit ni Roxas karon mao say nahitabo niya pagsugod sa kampanya unom ka tuig ang nilabay.
* * *
Dihang nidailos si Roxas alang ni Aquino niadtong 2009, human sa pagsulbong sa lapad nga pagbangotan ug pag-awhag nga padaganon ang anak sa bag-o lang namatay nga si Cory Aquino, siya ang nag-una gani dako kaayo ang iyang labaw sa pagka bise presidente.
Ang nagsunod ni Roxas mao si Senador Loren Legarda nga maoy runningmate sa nag-unang kandidato pagka presidente niadtong higayona nga si kanhi Senador Manny Villar. Si Binay nga maoy runningmate ni kanhi Presidente Joseph Estrada ikatulo ra, sama ni Roxas karon. Mahimong di na ganahang mosubli sa esena si Binay. Apan mahimo sang maoy usa sa nakapadasig ni Roxas karon.
* * *
Napanid-an sa mga eksperto nga tungod sa kadako sa labaw ni Roxas, nga nakumbinser tingaling di na siya maapsan ug tungod sa kadako sa pasiunang labaw ni Villar, mas kugihan si Aquino nga nangampanya sa nagkalainlaing bahin sa nasud.
May pipila ka kampanya sa Liberal Party (LP) dinhi sa Sugbo ug ubang bahin sa Pilipinas nga si Aquino ra ang nagtikawtikaw, wa na pakita si Roxas. Dihang nisulbong si Binay sa kataposang mga adlaw sa kampanya, nisubsob pagkuyog si Roxas sa mga kampanya ni Aquino. Naghimo gani og TV ads pagpahinumdom sa mga botante nga silay nagpares pagdagan. Apan uwahi nang tanan.
* * *
Bisan sa tanang giisip nga panagana pagpahibawo sa iyang kandidatura, nga naggumikan sab sa konsultasyon ni Aquino ni Senador Grace Poe ug ubang mga alyado sa administrasyon, gipaabot nga mas kugihan ang kampanya ni Roxas sa piniliay sunod tuig. Kana kun nakat-on siya sa leksiyon sa kasaysayan.
Niadtong 2010, pulos oposisyon silang Binay ug Roxas. Nakatabang sa ilang kawsa nga way klaro ang suporta ni kanhi presidente Gloria Macapagal-Arroyo sa opisyal nga kandidato sa administrasyon nga si kanhi Defense Secretary Gibo Teodoro. Karon hingpit ang suporta sa administrasyong Aquino alang ni Roxas. Apan napamatud-an sa duha na ka sunudsunod nga nasudnong piniliay sa 2010 ug 2013 ang talagsaong kalig-on ug kalapad ug kalawom sa makinarya sa politika sa mga Binay.
- Latest
