Pursigido g’yud si Presidente Aquino nga sa nahabiling mga buwan sa iyang termino, iya g’yud nga mapirmahan ang Anti-Dynasty Law nga magdili na sa mga politiko pagpadagan sa ilang kabanayan diha sa mga puwesto sa kagamhanan.
Nanglipaghong kuno ang panagway ni Vice President Jejomar Binay nga nakadungog sa State of the Nation Address (SONA) ni Presidente Aquino. Ang pamilya’ng Binay maoy una’ng maapektahan kun hingpit na nga aprobahan ang Anti-Dynasty Law.
Daghan kaayo nga sakop sa pamilyang Binay ang anaa sa lainlaing mga puwesto sa kagamhanan. Gawas kang Vice President Binay, dunay iyang anak nga kongresista ug mayor. Nindot g’yud nga aprobahan dayon ang mao nga balaod sa labing dali nga panahon.
* * *
Kun dili man gani g’yud mouyon si Senador Grace Poe nga mag bise lang ni DILG Secretary Mar Roxas nga maoy padaganon pagka presidente sa Partido Liberal, hayan ang LP mokuha og kandidato nga gikan sa Luzon.
Porbida ‘sab ni si Senador Poe nga mura’g gusto man g’yud nga maoy modagan pagka presidente bisan og kuwang pa siya og kasinatian sa pagdumala sa kagamhanan.
Duha pa lang ka tuig nga si Poe nahimo nga senador ug wala pa siya makahupot og mga puwesto sa kagamhanan nga “executive functions” mao nga unsa may mahitabo kun tugyanan dayon nato siya nga mahimong presidente?
Ang nindot g’yud nga si Poe magbise lang usa ni Roxas. Kay usa ra man g’yud ka termino ang presidente, mahimo na si Poe nga maoy modagan pagka presidente sa 2022.
Para nako, nindot ‘sab kun si Roxas makig-tandem ni Davao City Mayor Rodrigo Duterte. Kun sila mag-tandem ug pareho’ng modaog, nindot ang dagan kay si Roxas makamao na modumala sa nasud kay nakahupot na og mga executive ug legislative functions.
Haum ‘sab si Duterte nga tugyanan og katungdanan sama kang Vice President Erap Estrada kaniadto nga mimugna dayon og Presidential Anti-Organized Crime Task Force (PAOCTF).
Paminaw ko, masulbad g’yud ang mga badlongon sa katilingban kun si Mar ug Duterte ang mag-tandem.
* * *
Nakadungog ko nga si Grace Poe mag-tandem man diay kuno ug si Senador Chiz Escudero sa pagpapili isip presidente ug bise presidente. Para nako, mas makamao pa man si Chiz kay ni Grace Poe.
Aw hinuon, sikat lagi si Poe sa pagka karon. Apan basehanan na ba gud kini nga abi kay sikat maoy atong himuon nga presidente sa nasud? Panid-an usa nato kun matinud-anon ba siya nga moserbisyo.
Gisalikway baya ni Grace Poe kaniadto ang Pilipinas diha nga nanumpa siya nga American citizen.