EDITORYAL - Hadlok sa China

Naghinobra ka hambog ang nasud sa China sa ilang pangangkon og teritoryo sa West Philippine Sea (WPS). Apan mas labaw nang naghinobra ang katalawan sa mga opisyal sa gobiyerno pag-abot sa isyu sa WPS.

Ning bag-ohay lang mikisikisi ang China pagkahibalo sa planong pag-repair sa Rancudo Airfield sa Pagasa Island nga sakop sa lungsod sa Kalayaan sakop sa Palawan ug mas nabantog sa tawag nga Spratly Islands.

Apan si Defense Secretary Voltaire Gazmin miingon nga dako og gastuhon ang gobiyerno kun ipaagi sa transport planes ang construction materials nga gamiton pag-repair sa maong tugpahanan.

Sayop kini nga rason aron pasagdan ang maong lungsod, ug labaw nang dili kini hustong rason aron dili na lang palambuon ang maong dapit.

Kung wala nato mabadlong ang China sa reclamation projects niini sa pito ka mga dapit sa Kalayaan, nganong pugngan man nato ang atong kaugalingon nga ayuhon ug palambuon ang maong lungsod nga atoa man g’yud na nga teritoryo.

Sukad pa sa 1990’s ang Pilipinas nagpadiktar sa gusto sa China, apan wala kini nahimo dihang ang China nagbuotbuot og tukod og ilang isla sa maong dapit, kay numero unong rason mao ang naghinobrang kahadlok niini sa China.

Unsa man diay mas importante ang ikaestorya sa China o ang ikaestorya sa mga molupyo sa Kalayaan?

Sa pagkakaron, samtang nag-ung-ong ang arbitration didto sa United Nations, planohan nang daan kung unsay buhaton sa maong munisipyo.

Sa tan-aw sa kadaghanan ug sa sentimiyento sa mas daghang mga nasud naghinobra ug binuang ang 9-dash line sa China. Busa gipaabot nga pabor g’yud sa Pilipinas ang   mamahimong desisyon.