Espirituwal nga kahimsog

Dili nato malikayan nga usa sa himoon gayud natong prayoridad, mao ang pagbaton og kahimsog sa panglawas. Tungod kay kini man ang dugokan sa pisikal natong pakigbisog ning kinabuhia. Kun luyahon ang lawas di gayud kita makapaabot og maayong kusog sa paglahutay sa daghan pang mga pagsulay nga atong antuson. Mosamot kun ebalewala nato ang pagkat-on sa kahimsog.

Atong katungod kining tanan, nga dili paigo ang kwarta  aron paliton ang kahimsog, diin sa uban maoy gihimong sandiganan. Ang mahinungdanon gayud nga aduna kita’y kahibalo sa kabililhon, kun unsaon pag-atiman ang maayong panglawas nga nakasandig sa pang-espirituwal nga kahimsog.

Sama sa akong higala, hamugaway ang ilang kahimtang sa kinabuhi ug naedukar pa sa kahimsog sa panglawas, apan miabot ang dakung pagsulay. Kalit kining nasakit, nga nagdugay sa tambalanan. Gipapauli na lang sa balay kay kanser sa dugo ang sakit nga gitagalan na og pipila ka bulan.

Malipayong gidawat sa masakiton ang iyang sitwasyon. Kay matud niya, igo lang gipahulaman kaniya ang kinabuhi nga dili iya kundili sa Kahitas-an. Andam na siyang kuhaon ang iyang kinabuhi. Nag-ampo siya sa tumang pagpaubos, nga kun hatagan pa siya og lugway, tiwason niya ang misyon ning kinabuhia nga mao ang hugot nga pagsunod sa kabubut-on sa Magbubuhat.

Hangtud karon buhi pa ug may pamilya na, nga nahimong inspirasyon sa magtiayon ang spirituwal nga kahimsog. Tua na karon sila sa Amerika, sa usa ka misyon nga gipadayon ang pag-alagad sa kabubut-on sa Dios, pinaagi sa pagsangyaw sa mga pulong sa Dios didto sa halayong nasud, nga maoy pagsugot sa panaad, nga ang lugway nga kinabuhi gamiton sa kabalaanan.