Wa gyud diay gitagoan ang taxi operators sa Sugbo. Human nasibya sa Arangkada sa DYAB Abante Pa, Bisaya! ang reklamo sa taxi drivers nga gipaburot ang presyo sa Auto-LPG stations sa mga garahe sa operators, gihangop dayon ni Richard Cabucos, presidente sa Metro Cebu Taxi Operators Association (MCTOA), ang inspeksiyon nga gipasalig ni Regional Director Antonio Labios sa Department of Energy (DOE) sa Central Visayas.
Gisanong ni Labios ang among hangyo pagkuyog sa mga inspektor sa DOE. Dungan nga nanggikan sa ilang buhatan ang duha ka inspektor ug ang crew sa ABS-CBN News nga gipangulohan ni Joworski Alipon. Nakatag-an ka, gibabagan sa mga tagduma sa unang Auto-LPG station nga ilang gisusi ang among reporter ug cameraman.
* * *
Ambot unsay gikahadlokan sa taxi operator. Human nakasud ang mga sakop sa media sa Mamasapano, Maguindanao, di na magamit ang nasudnong seguridad isip rason sa pagtak-op sa iyang garahe gikan sa media. Unsa may iyang gikahadlokan nga makit-an sa among crew nga nahibawo man siyang hatagan ra gihapon mi sa DOE sa resulta sa ilang inspeksiyon?
Nahibaw-an sa mga inspektor sa DOE gikan sa duha ka Auto-LPG stations nga ilang nasusi nga:
Ang Certificate of Non-Coverage (CNC) sa unang Auto-LPG station ni-expire na niadto pang 2009, o unom ka tuig nang nilabay; ug
Ang ikaduhang Auto-LPG station wa gyod kapakita og CNC.
* * *
Nganong importante ang CNC sa pag-operate sa taxi operators sa ilang kaugalingong Auto-LPG stations? Ang CNC naghatag nila og pribilihiyo nga di motuman sa kuti nga mga panginahanglan sa kasarangan nga Auto-LPG stations kay di man para negosyo, ila ra mang kaugalingong taxi units ang gitubilan.
Klarong gi-abusohan sa taxi operators ang CNC kay gipaburot man ang presyo sa ilang Auto-LPG stations hangtod tag-P6 matag litro. Karong nasakpan nga wa diay CNC, dako diayng kolorum ang ilang mga estasyon. Ug di lang na maoy nangalisbo nga mga kalapasan nga ilang nahimo.
* * *
Matud ni Atty. Ralph Sevilla, kanhi legal officer sa Dakbayan sa Sugbo, kalapasan sa Revised Penal Code (Article 288) ang pagpamugos sa taxi operators sa ilang mga drayber nga adto ra magpatubil sa ilang estasyon. Hinaot nga hunungon ni nila sa labing daling panahon.
Hinaot nga susihon sab ni Cebu City Mayor Mike Rama ang laing nakaplagan sa DOE inspectors: Way business permit ang Auto-LPG stations sa taxi operators. Wa say napakita ang taxi operators nga opisyal nga resibo sa ilang pagpamaligya og Auto-LPG sa ilang mga drayber. Hinaot nga susihon ni sa lokal nga mga opisyal sa Bureau of Internal Revenue (BIR). Sa di pa sila mapaninglan ni BIR Commissioner Kim Henares nganong gipasagdan ang makabuhong nga mga transaksiyon sa taxi operators nga di mabuhisan.