Tungod sa gipagawas nga temporary restraining order sa Korte Suprema kabahin sa paggamit sa Precinct Count Optical Scan (PCOS) machine sa 2016 Elections, dako ang posibilidad nga magmano-mano pagbalik ang eleksyon sa sunod tuig.
Balik na usab sa kinaraan nga pwerteng langaya ug hagoa sa mga tawong motrabaho sa piniliay, dugangan pa ang karisgo sa seguridad ilabi na niadtong mga naa sa lagyo ug hilit nga mga lugar sa nasud. Samtang tinuod posibleng dunay mga bug-at nga rason ang petitioner nga Automatic Election System Watch batok sa Smartmatic apan ilaha una untang gitan-aw ang mamahimong epekto niini dili lang sa mga botante kondili sa kinatibuk-an ilabi na nga duol na ang eleksyon.
Ang rason nga “midnight deal” ang pag-renew sa kontrata sa Smartmatic kay gipirmahan kini tulo ka adlaw sa wa pa moretiro si kanhi Comelec Commissioner Sixto Brillantes Jr. niadtong Pebrero 2 ning tuiga, di makatarunganon aron paantuson ang publiko. Ang Comelec nanagana na lang daan tungod sa posibleng implikasyon niini, kun simbako dili g’yud ma-lift ang TRO posibleng sila na lang maoy mo-repair niini o mobalik sa mano-mano.
Apan ang pangutana, aduna ba kahay paigong technicians ang Comelec nga pasado sa standards aron sila masaligan?
Ikaduha, maapas pa ba ang pag-imprinta sa mga kinahanglanong elections materials alang sa manomano nga paagi?
Mabasol usab niini ang Comelec, di man siguro kini maingon niini kun ilaha nang gisugdan ang pagpangandam sa 2016 Elections duha ka tuig human sa uwahing eleksyon.
Kining maong hitaboa daw dunay nagpaluyong mga interes. Dunay gustong mopaak sa kontrata nga gustong makakwarta mao nga gisakit kaayo sa ilang dughan nga ang Smartmatic nga maoy nagsuplay kaniadto sa PCOS machines, mao lang gihapon ang gikuha aron mo-repair ug moandam sa mga makina.