Papating sa Makati
Tan-awa ra gud ning mga Binay. Wa pa gani hingpit makabanos sa Malakanyang, mao nay magbuot unsang balaora ang mapahamtang batok nila ug unsa rang balaora ang ilang tumanon. Ang pagtuo nga labaw sila sa bisan unsang balaod sa Pilipinas maoy hinungdan nga labihan nilang tiyabaw dihang gilambigit sa dagkong eskandalo sa Makati ug nangasuko pag-ayo dihang gi-imbestigar sa Senado.
Inay tubagon ang mga pasangil batok nila, gisumbalik na hinuon pagpasangil ang ilang politikanhong mga kaatbang nga maoy nilusad og kampanya pagpakauwaw nila. Aron pagsabotahe sa dakong labaw ni Bise Presidente Jejomar Binay batok sa tanang posible niyang ikaparang sa piniliay’ng presidensiyal sa Mayo 2016.
* * *
Sublion ra gud nato palihug ang ilang nukos-nukos aron lang gyud paglawgaw sa mga pakisusi sa pasiunang mga ebidensiya sa ilang pangabuso sa gahom ug pagpangawkaw sa katungdanan:
Dihang nitumaw ang daghan na uyamot nga mga dokumento sa daghang gitagoan nilang kabtangan ug mga transaksiyon, gihagit nilang mga namasangil sa di pagsalida sa Senado kun dili sa pagpasaka nila og kaso atubangan sa mga hukmanan; apan
Dihang gidawat sa mga namasangil ang ilang hagit ug pormal nga gipasakaan og mga kasong pagpangawkaw atubangan sa buhatan sa Ombudsman, ang mga Binay nitulisok dayon sa Malakanyang nga maoy nangu sa determinado nga pagpanggukod nila.
* * *
Sa way pagpatin-aw sa law-ay nilang lit-ad-lit-ad, niinsistir sab ang mga Binay nga sila ray magbuot kanus-a sila angay’ng ikiha, kanus-a sila moatubang sa mga kaso ug kanus-a sila motahud sa mga balaod:
Dihang nimando na si Ombudsman Conchita Carpio-Morales pagpaubos ni Makati City Mayor Junjun Binay sa unom ka buwan nga preventive suspension, nitiyabaw na sab ang mga Binay sa kapaspas sa pagsusi sa mga kaso batok nila; ug
Gipasanginlan sa mga Binay ang Malakanyang nga nimaniobra sa sistema sa hustisya sa nasud apan nidalidali pagdangop sa Court of Appeals (CA) aron pugngan ang Ombudsman sa pagsuspenso ni Mayor Binay.
* * *
Sa determinadong paugat pagmatuod nga way balaod nga makadut nila, ang mga Binay nipaundayon pa gyud sa nangalisbo na nilang pasiuna nga mga maniobra:
Dihang nadawat na sa Department of Interior and Local Government (DILG) ang kopya sa kamandoan sa Ombudsman, gihagit nila si DILG Secretary Mar Roxas pagpangunay pag-serve sa suspension order;
Dihang wa mokubit si Roxas sa ilang bugalbugal, giawhag nila si Roxas sa pagpaabot sa hukom sa CA sa ilang petisyon alang sa temporary restraining order (TRO);
Dihang gi-serve nang suspension order ug gipapanumpa na si Acting Mayor Romulo Peña, nagdumili gihapon ang mga Binay pagtahan sa City Hall; ug
Nagpiyesta ang mga Binay dihang nakakuha og TRO gikan sa CA bisan klarong wa nay kapuslanan kay naluwatan pila ka oras na human nakapanumpa si Peña.
* * *
- Latest
