Dear Atty. Divine,
Ang among amahan adunay 16 ka ektarya’ng yuta ug gibahin-bahin namo nga mga anak kay siyam man kami ka magsuon ug ang among amahan nabinlan og lima ka ektarya isip iyang share. Naminyo pag-usab ang among amahan ug duna sila’y unom ka anak sa iyang ikaduha’ng asawa. Ang akong pangutana kun duna pa ba kami katungod nga mangayo og share sa nahibiling yuta sa among papa lakip na ang iyang unom ka anak sa ikaduhang asawa? Kanang conjugal property sa iyang ikaduha’ng asawa sama sa truck makabahin pa mi’ng mga anak niya sa first wife? - Elma
* * *
Dear Elma,
Kun buhi pa ang imong amahan, wa pa g’yud mo’y katungod nga mangayo kaniya og share apan kun wa na ang imong amahan, isip mga anak may katungod kamo nga mangayo og share sa iyang kabilin kay kadto’ng una ninyo’ng gibahin sa katungod man to sa inyong inahan. Apan mas mogamay na ang inyong bahin karon kay ang iyang mga anak sa ikaduha’ng asawa entitled man ‘sab sa bahin. Samtang sa conjugal property uban sa second wife, makapangayo mo og share sa habig ra sa imong amahan uban sa unom niya ka laing mga anak ug wa na kamo’y katungod sa share sa iyang second wife. Thanks and God bless. - Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com og akong tubagon ang inyong pangutana pinaagi sa akong column.