Dear Atty. Divine:
Duna ko’y pangutana may labot sa kaso nga gipasaka sa akong anak batok sa mikulata kaniya. Pending na ni karon sa fiskaliya apan sa sunod buwan gikatakda na nga molarga ang akong anak sa gawas sa nasud.
Dili siya gusto nga ma-dismiss lang ang iyang kaso. Unsa may maayo namo nga buhaton? Nasayud ko sa tanang nahitabo kay iya ko’ng gisultian, mahimo ba nga ako’y morepresentar kaniya sa korte? -Emily
Dear Emily,
Kun molarga na ang imong anak, mahimo nga magbilin siya og Special Power of Attorney kon SPA nga maghatag kanimo og katungod nga maoy morepresentar kaniya sa pagtambong sa mga hearing sa korte, sa pagpakig-negotiate sa gireklamo sa civil aspect sa kaso alang sa posible’ng pag- areglo ug uban pa. Apan dili ka puwede nga maoy mo-testify in behalf sa imong anak ngadto sa korte gawas lang kun duna ka’y personal knowledge o nakakita g’yud ka atul sa pagkulata sa imong anak. Kay kun igo lang ka gisultian sa imong anak sa nahitabo, then mahulog nga hearsay ang imong testimonya kay wa kay personal nga kasayuran ug dili kini admissible sa korte. Hinuon naa pa man sa fiskaliya ang kaso mao nga mas maayo magbilin ang imong anak og SPA ug kun magsugod na og trial unahon lang ninyo pagpresentar ang ubang witness then kun mouli na ang imong anak siya g’yud ang personal nga mo-testify sa korte sa iyang kaso nga gipasaka.- Atty. Divine
Alang sa inyong pangutana may kalabutan sa problema’ng legal, ipadala lang sa Legal Corner sa Banat News or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.