Pila ka buwan na ang nakalabay, ang konseho sa Barangay Quiot, dakbayan sa Sugbo, nagpalabang og ordinansa nga naghangyo sa siyudad nga unahon pagpahiluna ang mga informal settlers nga dugay na nga nagpuyo sa barangay sa dili pa dugangan og mga informal settlers nga papuy-on sa Barangay Quiot.
Amo man gud nga namatikdan nga adunay mga informal settlers nga dili taga Barangay Quiot nga gipangdawat sa dakbayan ug sila gipasaligan nga sa Barangay Quiot sila papuy-a.
Giingon man gud nga sa Barangay Quiot ipatukod ni Mayor Mike Rama ang medium-rise building nga maoy papuy-an sa mga informal settlers sa dakbayan sa Sugbo.
Dili ikalimod nga daghan ‘sab nga informal settlers nga nagpuyo sa Barangay Quiot busa kami’ng mga opisyal sa barangay naninguha nga sila matabangan sa ilang kahimtang.
Apan unsa ba nga pagkabutanga nga sa among pagsusi gibalibag man diay sa konseho sa dakbayan sa Sugbo ang among ordinansa? Ang nakapaet kay bisan gamay wala gayud kini mohatag og rason sa ilang pagbalibag sa among ordinansa.
Ang konseho sa Barangay Quiot naglibog sa gihimo sa konseho sa dakbayan sa among ordinansa nga gipa-review kanila. Bisan usa lang g’yud unta ka linya nga rason, wa g’yud. Bisan gamay na lang unta nga respeto sa mga konsehal nga naghago pagpanday niini, wa g’yud.
Sigun sa mga abogado nga among gikonsulta ilang giingon nga walay babag ug wala makalapas sa Local Government Code ug sa Batakang Balaud ang ordinansa nga among gipalabang apan ngano’ng gibalibag ra man kini sa mga konsehal sa dakbayan?
Ambot ug dili ba pud kaha sa rason nga ang ordinansa nakaligis sa ilang mga plano?
Akong nasayran nga adunay mga konsehal nga sakop sa BOPK ang giingon nga nangdawat na og mga papeles para sa medium-rise building nga pagatukoron sa Barangay Quiot aron maoy papuy-an sa mga informal settlers sa dakbayan. Ambot unsa ni ka tinuod. Pero kun tinuod, labing seguro mao kini ang rason ngano nga gibalibag ang gihisgotan nga ordinansa sa barangay.