Usa kini ka kasinatian nga adunay nindot nga mensahe. Gisaysay nato kini aron kakuhaan og ehemplo o leksyon sa kinabuhi.
Alyas lang ang ngalan sa mga protagonista nga gigamit nato alang sa usa ka sitwasyon. Si Don Gally, tigulang na, way asawa apan giisip niyang dakung pamilya ang pagmahal sa tanang tawo nga nag-alagad sa daku niyang negosyo isip 'land developer.'
Si Dong Fredmon, tulo na ka dekada nga nahimong direktang kasaligan sa tanan niyang proyekto. Masaypan siyang labaw pa sa tag-iya, tungod sa kaistrikto niini sa mga trabaho.Hurot ang bilib sa iyang amo, nga nakumbinser sa iyang talagsaong kakugi ug maayong pagdala sa tahas sa trabaho nga gisalig kaniya. Maunongon siya sa buhat nga dili gusto nga mabulilyaso.
Dili tiaw ang sakripisyo niya, nga nakatampo sa pagka-adunahan ni Don Gally. Apan si Dong Fredmon, sa kadaku sa sweldo niya, wa gyuy makita nga kabtangan bisa’g balay nga kapuy-an sa iyang pamilya. Nakahukom na siyang mopahulay sa probinsya aron adto na lang manginabuhi kauban ang pamilya.
Dihang nanamilit na kini, may sugyot si Don Gally, nga hawiran siya sa katapusang higayon, tungod sa dakong proyekto nga ipiyal kaniya ang tanan hangtud matapos. Tuod man bisa’g pungot apan iyang gidawat. Dali ra natapos ang gitukod nga dakung mansiyon. Sayud siyang huyang ug delikado kini puy-an kay bisa’g tay-ogon lang kini’g hinay nga linog. Apan sa isip niya, di na ni iyang problema. Ang importante nga may daku siyang subrang kwarta nga iyang naganansya.
Apan nahikurat siya dihang gihatagan siya’g pungpong sa mga yawe. "Oo Dong Fredmon, mao ni ang ihatag kong surpresa nimo. Kining mga dokumento nagpamatuod nga ikaw maoy tag-iya ining dakung mansiyon nga gitukod mo".