Mga bakak sa Mamasapano
May pipila ka kasayuran sa engkuwentro sa Mamasapano, Maguindanao nga nakuha ang Board of Inquiry (BOI) sa Philippine National Police (PNP) nga wa mahipos sa buwag nga mga imbestigasyon sa Senado ug House of Representatives ug bisan sa mas agresibong pakisusi sa mga sakop sa media.
Mao nga ang 120 ka pahina nga report nga gisumiter sa BOI sa niaging semana maoy labing komprehensibo nga subay sa trahedya nga nipatay sa 44 ka sakop sa Special Action Force (SAF). Gawas sa pagtulisok nilang Presidente Noynoy Aquino, kanhi PNP chief Alan Purisima ug kanhi SAF chief Getulio Napeñas, gibisto sab sa BOI ang klarong pamakak sa mga protagonista samtang nagpadayon ang gubat.
* * *
Gikuwestiyon sa BOI ang pagpada ni Purisima og kasayuran ngadtong Napeñas nga gawas nga wa masusi unsa katinuod wa pa gyod maklaro kinsa ang tinubdan. Sa alas-9:45 sa buntag niadtong Enero 25, kanus-a niulbo ang labing grabeng pinusilay tali sa mga sakop sa SAF, Moro Islamic Liberation Front (MILF), Bangsamoro Islamic Freedom Fighters (BIFF) ug private armed groups (PAGs), ni-text si Purisima kang Napenas:
“Nagbigay ng directive order MILF central comm., wlang MILF pwde lumapit sa ongoing PNP opns in Mamasapano Sir, yung nagresist mga tao ni mohamadali tambato and basit usman wd wanted politician Sir, mahina pwersa nla, mabuti nag advise kasi mem MILF gusto magsali pina pull out na sila ngaun.”
* * *
Sayop ang kasayuran ni Purisima. Niadtong orasa, mao pay pagpahibawo ni Heneral Carlito Galvez Jr., pangu sa Coordinating Committee on the Cessation of Hostilities (CCCH) sa gobiyerno, sa iyang katugbang sa MILF nga si Rashid Ladiasan mahitungod sa panginahanglan sa dinaliang ceasefire.
Pagka alas-11:19 sa buntag, nipada si Purisima og laing sayop nga text ngadtong Napeñas: “I asked our contact where they will withdraw direction. His reply…Going to marsh area Sir, meron ibang tropa, nakaharang sa daanan nila, ingatan ng tropa mga arm groups ng rogue politicians s baba banda ng Mamasapano, more or less 100 armado nakaposition.”
* * *
Nangagpas ang BOI nga ang sayop nga kasayuran ni Purisima nakatampo sa kalibog ni Napenas. Tunga sa oras human nakadawat sa kataposang tawag sa radyo sa 55th Special Action Company nga hapit na sila mahurot (“Mauubos na kami dito”), si Napenas ni-text ni PNP Chief Leonardo Espina pagka ala-1:26 sa hapon: “Ang report tao nila wounded pero wala pa patay Sir.”
Gisaway sa BOI ang paggamit nilang Napeñas ug Purisima og text messages, nga gahinan pa og panahon pagsuwat ug mahimong di dayon mabasa, bisan sa kamahinungdanon sa operasyon ug sa kadinalian sa panginahanglan pagluwas sa naapiking SAF commandos. Mas mahinungdanong pangutana: Nganong nidangop na man lang sa pamakak silang Napeñas ug Purisima?
- Latest
