EDITORYAL - Pagkaluoy sa Pilipinas

Wala lang gihapon maalarma ang Kongreso niining hinay-hinay nang pagkuha sa China sa mga teritoryo sa Pilipinas diha sa West Philippine Sea (WPS).

Ang mga magbabalaod napokus na og maayo sa isyu sa Mamasapano encounter ug paggukod sa ilang mga kaatbang sa umaabot nga 2016 Elections.

Nagplano ang China nga did-an na ang mga Filipino nga motaak sa Ayungin Shoal nga gibantayan karon og pipila ka buok nga Philippine Marines sa gisangad nga tayaong BRP Sierra Madre.

Ang Sugboanon ug kanhi opisyal sa Philippine Air Force nga si Magdalo Partylist Rep. Francisco Acedillo, miingon nga ang labing uwahing reclamation project sa China hulga na sa Ayungin Shoal ug sa mga tropang nagbantay niini.

Ang labing uwahing gipangtukoran sa China og artipisyal nga isla ug karon aduna nay tag-as nga edipisyo mao ang Panganiban Reef ug Zamora Reef nga mahimong base sa mga barko nga epektibong makababag sa agianan padung sa Ayungin.

Sa kinatibuk-an pito na ka mga teritoryo sa Pilipinas ang giokupar sa China, kining maong mga dapit kaniadto abunda og isda alang sa mga Pilipino apan karon ang China na maoy nakabenepisyo.

Nakita ni Acedillo anaa karon sa dakong peligro ang Pilipinas sa seguridad sa pagkaon niini ug ingon man ang seguridad sa tibuok nasud tungod sa mga “isla” sa China sa sud sa tugkaran sa nasud.

Kining maong mga artipisyal nga isla planong butangan og tugpahanan aron butangan sa mga modernong fighter ug bomber aircraft sa China nga makasud-gawas sa Pilipinas nga way makapakgang.

Nag-enjoy karon ang China sa ilang ‘creeping invasion’ tungod kay napokus ang mga magbabalaod sa pagsakay sa mga isyu sa sud aron iisa ang ilang kaugalingong mga interes.