EDITORYAL – Mura’g may gikahadlokan

Wala malilong kang Mayor Michael Rama nga nag-anam na og kaut-ot ang gidak-on sa atong mga karsada sa ubay-ubay nga mga dapit dinhi sa dakbayan sa Sugbo.

Kini tungod sa grabe’ng kahakog og mga puwesto sa mga tawo nga anaa nagpuyo daplin sa karsada. Kun padayon nga magpasagad ang mga nagdumala sa dakbayan, monipis pa g’yud ang mga karsada sa umaabot nga katuigan.

Suroyan nga pagkatawo si Mayor Rama ug imposible nga wala siya makakita sa mao nga mga talan-awon nga mugna sa pagkahakog og puwesto sa daghang mga tawo nga nagpuyo daplin sa karsada.

Luya kaayo sa ilang mga trabaho ang mga sakop sa demolition team sa City Hall nga moguba sa mga illegal structure. Mura’g masabot nga huwaton nila nga mahuman na ang balay nga gitukod ug nagtungtong na sa mga aseras unya mosamot nga sila maglisod na.

Kanus-a kaha ang dakbayan sa Sugbo makabaton og tawo nga adunay tukma nga kaisog – sama ni Bayani Fernando kaniadto – nga gipangkupog ang mga illegal structure nga anaa gitukod sa aseras.

Ang mga sakop sa City Hall demolition team miguba kagahapon sa gihimo nga tapangko sa himoanan og lapida kilid sa menteryo sa Carreta bisan og ang atop niini green og yellow – ang kolor sa Team Rama.

Apan bisan og ila kini’ng gihimo masabot gihapon kaayo nga adunay gikahadlokan ang PROBE Team kay hangtud karon wala sila makahapsay sa usa ka bahin sa Legaspi Street nga duol sa Barangay Hall sa Santo Niño gibutangan og mga tindahan ang aseras ug karsada.

Daghan pa nga ilegal nga ila ra’ng gipasagdan.