Mga remedyo sa almoranas (1)

Daghan nang nagpakisayod sa atong lindog mahitungod aning almoranas. Bueno mas maayo gyud nga ipatan-aw sa doctor, aron mahapsay ang isip kun unsay angay nimo buhaton. Hinoon, duna may daghang remedyo ini, nga di ka na hasolon sa kasakit sa almoranas. Matud pa, mao ni ang paspas nga epektibo - daling mawala sa kasakit o mopahiyos sa nagbudlot nga kibot.

*ICE BAG - Sudli kini’g dinugmok sa 'ice' o yelo. Kun wa, isulod sa plastic nga limpyo ang gipinong 'ice', unya ipabugnaw sa apektadong kibot. Ang kabugnaw maoy mopahunong sa dugo nga mopakupos sa almoranas.

*ZITS BATH - Mag-andam kag 'bath tub' o dakung planggana nga lawom nga igong maumog o mahumol ang lubot ug paa nga magpungko sa igo nga maagwantang kainit sa tubig, nga sagolan og ½ sa tasa nga 'apple cider vinegar' (suka sa mansanas). Buhata ni sud sa 15mins. Sublia o himoa ni sa makadaghan sa 1 ka adlaw hangtud nga mohiyos o molurang ang kasakit.

*ANTI-INFLAMMATORY CREAM - Pahiri og 'cream' o 'ointment' nga may sambog nga lana sa mga 'natural herbs' nga anti-inflammatory, sama sa aloe-vera ug uban pa.

*APPLE CIDER VINEGAR - Moinom kag 1 ka kutsara ini, kada human og kaon. Unya, magkuha sab ka’g gapas (cotton ball) basaa sa 'apple vinegar', dayon ihunad nga pasagdan mouga.

*AHOS (GARLIC) - Matud pa, mas paspas o mas epektibo kaayo ni kay sa uban, apan hapdos lang pero dali man pud mokupos o maalibyo ang butbot nga namudlot sa kasakit. Magdukdok og 1ka lobong ahos,  pinohon hangtud magbasa ni sa duga. Dayon idirekta kini og paslak sa kibot nga gialmoranas.