Ang pagpatubo sa buhok (1)

Daghang teknolohiya karon alang sa pag-atiman sa mga problema sa atong buhok. Bisa’g gusto ta nga di na motubo ang buhok. O kaha gusto ta nga dunay buhok, magpa 'hair transplant' pero dako la’g gasto. Ang atong tema karon, ang remedyo sa pagpatubo sa buhok pinaagi sa mga gamitunon nga anaa lang sa atong kusina. Sulayan nato, total simple ra man ni buhaton.

* Red Onions (pulang sibuyas Bombay) —  Di lang ni lamas sa pagkaon, kun dili makatabang sad ni sa pagpatubo sa buhok. Ngano man? Kay duna ni 'sulphor' nga mopadaghan sa prodaksyon sa tisyu nga 'collagen', nga moayuda sa pagpatubo og balik sa mga buhok.

(a) Pagkuha’g 2-4 ka buok nga pulang sibuyas Bombay. Unya kagora ni ug pug-an sa duga. Inighuman, imasahe ang duga sa bagulbagol, sud sa 1 ka oras. Ighuman pasagdi ni sud sa 15 mins, dayon banlawa’g tubig, gamiti’g 'mild shampoo'……Unya laing alternatibong paagi sa paggamit niini kun mahadlok mairita ang mata, Kini ang buhaton:

(b) Pagkuha’g 4-5 ka buok nga pulang sibuyas Bombay, hiwahiwaa kini. Unya pagtak-ang og 1 ka litrong tubig. Inigbukal, ilunod ang mga hiniwang sibuyas. Pasagdi nga magbukal kini sud sa 5-10 mins. Dayon pabugnawa. Unya salaa ug gamita ang tubig ini nga ihunad sa bagulbagol, ighuman nimo’g shampoo. Kun kaagwanta ka sa baho, ayaw lang una waswasi og tubig. Inigkaugma na nga limpyohan sa tubig. Di lang motubo ang buhok, mosinaw pa gyud kini nga ingon sa himsog nga buhok.

Sa sunod isyu atong tukion, ang dugang pang mga paagi o remedyo sa pagpatubo sa buhok.