People power

Si kanhi Presidente Ferdinand Edralin Marcos napalagpot sa katungdanan pinaagi sa People Power Revolution sa katawhang Pilipinhon nga gilangkoban sa mga sibilyan, kaparian, armadong kusog ug uban pa’ng sektor sa atong katilingban. Napuno sa pasangil sa mga dili maayo’ng binuhatan ang kanhi pamunoan ni Presidente Marcos ug hinungdan nga daghan ang misaway niini gikan sa nagkadaiyang sektor sa katilingban ug nakaaghat kaniya pagdeklarar og Martial Law pinaagi sa Presidential Proclamation 1081 kaniadtong Septiyembre 21, 1972. Ang iyang pagpaubos sa nasud sa Martial Law mao usab ang nahimo’ng hinungdan sa paglahutay og kapin sa 20 ka tuig niya’ng pamunoan diin iyang nahimo ang daghang kausaban sa iyang pagpadagan sa kagamhanan.

Nagmalampuson si kanhi Presidente Marcos sa iyang gihimo nga pagpaubos sa Martial Law sa nasud kay sa sinugdanan naangkon man ang kahapsay ug kalinaw tungod kay si bisan kinsa nga moalkontra kaniya dakpon man ug ibalhug sa bilanggoan. Apan diha’ng gipul-an na gayud ang katawhan, misangko gayud sa People Power Revolution nga maoy nagpalagpot ni Marcos gikan sa 20 ka tuig niya nga katungdanan.

Niini’ng administrasyon ni Presidente Benigno Simeon Aquino III subli na usab nga mitumaw ang mga lakang sa pagpakanaug kaniya sa katungdanan.

Dili hinuon tungod kay gipul-an na ang katawhan kaniya kun dili tungod kini sa kabalaka nga mapasar ang Bangsamoro Basic Law nga nag-ung-ong na karon sa kongreso ug senado nga giduso gayud sa presidente.

Ang kabalaka sa mga Filipino nga human unya mapalabang ang BBL dili gihapon sensiro ang Moro Islamic Liberation Front (MILF) sa kasabotan kay napatay man gani ang 44 ka sakop sa PNP Special Action Force (SAF)  nga gitahasan pagdakop sa international terrorist nga si Zulkifli Bin Hir alyas Marwan ug kauban nga nagtago sa Mamasapano, Maguindanao.

Tungod niini, gisaway si Presidente Aquino ug giawhag sa pagkanaug sa katungdanan tungod sa kasagmuyo sa ubang sektor sa katilingban nga imbes mokondinar  sa MILF padayon na man hinuon sa iyang tinguha  sa pagpalabang sa BBL.