EDITORYAL – Langyaw nga abusado

Nagbansiwag sa mantalaan kagahapon ang balita nga naglambigit og langyaw nga mihimo’g pangabuso samtang dia siya sa atong nasud. Ginudnod sa langyaw ang nawong sa lalaki ngadto sa iyang kinatawo diha’ng nagkatagbo sila sulod sa pansayan sa usa ka mall.

Wala la’y suwerte ang mao nga langyaw kay ang gihimoan niya og pangabuso usa man ka polis mao nga dali ra siya’ng nadakpan. Angayan nga ipahamtang gayud sa mao nga langyaw ang tukma nga balaud.

Sagad sa mga Filipino magmatngon gayud nga dili makahimo og salaud kun tua kini sa laing kanasuran. Apan lahi ang ubang mga langyaw kay giisip nila ang ilang kaugalingon nga gamhanan bisan dia sila sa Pilipinas.

Ang uban sa mga langyaw mohimo pa og pagpangabuso sa atong kababayen-an. Dili kaha ang batasan sa mga Filipino nga dali ra kaayo moyukbo og mga sapian maoy nakaingon niini nga nahimo’ng ubos kaayo ang ilang pagtan-aw kanato?

Dili ikalimod nga daghan kaayo sa mga Filipino ang taas kaayo’g pagtan-aw sa mga langyaw. Bisan og nagpurol-purol ra ang langyaw apan nabutang na sa huna-huna sa katawhan nga kuwartahan ang mao nga tawo ug taas kaayo ang ilang pagtan-aw kanila.

Angay’ng usbon na sa mga Filipino ang atong batasan. Kun makahimo og pangabuso ang mga langyaw samtang ania sila sa atong nasud, angay sila nga pahamtangan gayud og silot.

Hinuon, kadto’ng mga langyaw nga buotan ug matinahuron angay usab sila nga bugtian og kaayo nato’ng mga Filipino.