Abi nako og ako ra ang nakabantay, apil ‘sab diay ang higala nako nga si Barili Councilor Rene Alquisola nakamatngon nga mura’g nagkuwang sa ilang serbisyo ang mga sakop sa PNP Highway Patrol Group.
Sige og travel si Konsehal Alquisola gikan sa Barili ug paingon dinhi sa dakbayan apan wala gayud siya makakita og mga sakop sa PNP Highway Patrol Group nga magpatrolya diha sa mga national highway.
Sigurado kami si Sangay Rene nga kun motinuod lang ang mga sakop sa Highway Patrol Group sa pagpanakop sa mga abusado’ng drayber, daghan g’yud sila og masakpan.
Daghan sa mga drayber, ilabi na ang mga bus nga pasaheroan, abusado kaayo nga mopadagan nga mura’g hari sa karsada. Kun awto ang imong sakyanan ilabi na og traysikol, sugaton ka nila.
Kini’ng matanga sa mga drayber angay na nga dakpon kay nakahatag sila og peligro sa ubang motorista. Kaniadto lagi, nagpaingon ko dinhi sa dakbayan sa Sugbo gikan sa Bogo ug nagmaneho’g awto.
Pag-abot nako sa Catmon, naglumbaanay ang duha ka bus nga ako’ng ikasugat. Pastilan, talisulod na unta ko sa two-way nga taytayan unahan sa Poblacion, Catmon apan kalit ko’ng mipadaplin ug mi-brake.
Mi-overtake ang usa ka bus diha g’yud sa taytayan ug kun midayon pa ko pagsulod sa taytayan, sigurado nga pusa ko. Ingon niana kaabusado ang ubang drayber og bus nga angay na nga dakpon.
Asa na ang Highway Patrol? Nangatulog?
* * *
Naminaw ko sa radyo niadto’ng Biyernes. Mura’g talilansar na pagka presidente si Davao City Mayor Rodrigo Duterte. Aw kini hinuon si Duterte duna g’yuy political will.
Hadlok g’yud ang mga druglords ug pushers ani kay dili man kini magpanuko. Sigurado ko nga kun mag-presidente si Duterte unya makadaug, magmugna ni siya og special team sa mga “tirador.”
Ang ako lang, kuyawan ko nga ang mga bata-bata unya ni Duterte mopahimulos sa higayon. Kapila ra ma’y pagbutang-butang nga ang gipatay druglord ug drug pushers.
Gitimbang-timbang nako ang tulo ka “aspirants” nga sila si Vice President Jejomar Binay, DILG Secretary Mar Roxas ug Duterte kay wala pa man mopadayag ang uban, sa ilang tulo maayo si Roxas.
Atol sa iyang termino kaniadto “number-1” siya nga senador kay maoy nakakuha og labing taas og botos. Siya ang utok sa pagpasulod dinhi sa nasud sa mga call centers diha’ng secretary pa siya sa Department of Trade and Industry (DTI).