“Dihadiha gipaadto si Jesus sa Espiritu Santo ngadto sa kamingawan. Nagpabilin siya didto og 40 ka adlaw ug gitintal siya ni Satanas.(Mk. 1;12-13).

Atong hinumdoman nga ang tentasyon, dili usa ka sala kondili kahigayonan lamang sa pagpakasala. Tumong sa kaaway nga mao si Satanas nga mahisalaag ang tawo gikan sa hustong dalan ug agnihon niya ang tawo palayo sa Dios pinaagi sa pagpakasala sanglit ang sala, mao man ang makapahimulag sa tawo gikan sa Dios.  Ang sala linugdangan sa usa ka pagpili. Kini nagpasabot nga anaa niini ang mga mosunod nga mga elemento:

Kahibalo (Knowledge) diin ang tawo nakahupot nang daan sa mga kinahanglanong impormasyon kalabot sa iyang pagahimoong lakang. Sama pananglit sa pagpatay. Ang pulong o buhat nga “Pagpatay” ang nakahupot nang daan og usa ka negatibong implikasyon. Dautan na kini daan.

Kagawasan (Freedom) Mahimong likayan sa usa ka tawo ang paghimo sa maong sala. Apan bisan pa man kun anaa kaniya ang kagawasan sa paglikay, apan iya gihapon kining gihimo.

Kabubut-on (Will) nga sa ato pa, nagasukad ang maong paghimo gikan sa personal nga disposisyon gyud sa tawo nga iyang himoon ang maong kalapasan.

Kining  tulo ka  elemento, maoy nakapahimo sa usa ka buhat ingon nga usa ka sala. Wala masakop niini ang mga tawong dunay suliran sa pangisip ug panghunahuna. Ang pagpakasala adunay posibilidad nga  mahimong usa ka adiksiyon diin ang tawo nahimong nagapos sa naandan niyang sala nga kanunay niyang himoon (habitual sin) ug seguro nga kini ang magdala sa tawo og kalaglagan. Ang Tentasyon mura og usa ka SALAD. (Sayon, Lami, Dali).