EDITORYAL - Asa padung ang MILF

Samtang gitinguha sa tanan ang kalinaw sa Mindanao, kinahanglang di mabutang sa ubos kaayo nga posisyon ang gobiyerno sa pagkab-ot niini.

Wa hinuon kini magpasabot nga kinahanglang magmagahi ug magpaugat ang gobiyerno ug dili na maminaw sa posisyon sa mga rebeldeng Muslim.

Dunay bahad nga dili dawaton sa Moro Islamic Liberation Front kung usbon ang draft sa Bangsamoro Basic Law nga maoy naporma tali sa GPH-MILF peace panels.

Sama sa usa ka pamilya, ang ginikanan maoy modumala sa panimalay. Ang Moro Islamic Liberation Front maisip nga  matinumanon sa gusto nga ilang anak nga kinahanglang tabangan ngadto sa hustong dalan.

Tinuod lisod dawaton kun ang mga pang-usbon mao ang mga probisyong maoy buot nilang mahitabo sa BBL, apan kun mao kini ang makaayo sa kinabag-an angayan nila kining dawaton.

Sa Mindanao makita ang kinapobrehang mga komunidad sa nasud, resulta kini sa way hunong nga kagubot hinungdan nga napagan ang paglambo niini ug nabiyaan sa ubang mga rehiyon.

Kung dili kini masolusyonan sa gobiyerno, mas modaghan pa unya ang mapuno sa listahan sa mga komunidad nga malubong sa kakabus.

Ang angay buhaton sa MILF mao ang pagsalikway na sa ilang tinguhang mobuwag sa Pilipinas kay wala man kini padulngan, nasayod man siguro sila nga dili lamang mga Muslim ang lumad sa Mindanao.

Kinahanglang ilaha kining dawaton nga adunay dignidad ug ipakita sa tanan nga duna silay katakos nga  matabangan ang ilang komunidad.

Sa habig sa mga magbabalaod, kinahanglang dili sila magpadiktar sa ilang emosyon sa paghimo og mga kausaban sa BBL.