Blackout sa Kabisay-an

Kun dugay kang nakamata kay nisugat gyud sa Chinese New Year, o kay nagsalig nga way klase ug way trabaho tungod sa special non-working holiday ug busa makapamawi og katug, wa kang kasinati sa lapad nga blackout nga niigo sa pipila ka bahin sa Kabisay-an, apil nang Sugbo, Bohol, Leyte, Southern Leyte ug mga lalawigan sa Samar.

Apan sa mga kinahanglang mangmata og sayo, di kasarangan ang kangitngit nga nisugat sa ilang pinuy-anan ug sa tibuok nilang kasilinganan. Nagsugod ang dul-an sa walo ka oras nga blackout sa ala-1:45 sa kaadlawon ug hingpit nga nahibalik ang normal nga suplay sa kuryente pagka alas-9:09 na sa buntag gahapon.

* * *

Usa sa labing naigo mao ang amihanang bahin sa Sugbo nga nagsalig sa suplay gikan sa Leyte. Gibanabana sa Visayan Electric Company (VECO) nga 198 megawatts ang nawagtang sa ilang suplay. Nagpakisayod dayon sila sa National Grid Corporation of the Philippines (NGCP) kun unsay nadaot--ang ila bang linya o ang mga planta ba sa kuryente sa Leyte.

Hangtod sa akong pagsuwat niini wa pay tubag ang NGCP. Igo lang nipahibawo nga nagpadayon pang ilang pakisusi sa hinungdan sa blackout. Salamat nga nahitabo samtang nangatug ang kadaghanan, nibalik ang katugnaw sa Amihan ug di dako ang demanda sa kuryente tungod sa holiday.

* * *

Salamat sab sa sistema nga gipatuman nga ang power distributors, sama sa Veco nga nagduma sa Metro Cebu, Mactan Electric Company nga nagsuga sa Lapu-Lapu City ug Mactan ug Cebu Electric Cooperative (CEBECO) sa ubang bahin sa Sugbo, nga makapangita sila og alternatibong suplay sa kuryente kun mapid-ok ang naandan nilang tinubdan.

Nanawag dayong VECO sa igsuon nilang mga kompaniya, ang Cebu Private Power Corporation (CPPC) ug East Asia Utilities Corporation, aron mapaandar ang ilang mga planta ug matapakan ang kuwang nga suplay. Nakasiga pagbalik ang tanang feeders sa VECO pasado alas-6 sa buntag, o lima ka oras human sa blackout.

* * *

Ang dakong bentaha sa Sugbo mao nga subra ang suplay sa kuryente. Maong ang VECO, MECO ug CEBECO makapatuyang pagpangita sa labing barato. Mao ni hinungdan nga labing dako sa suplay di lang Sugbo kun dili sa tibuok Kabisay-an naggikan sa baratong geothermal power sa Leyte.

Sa kasarangang mga adlaw pawngon ang ubang mga planta sa kuryente sa Sugbo kay mas mahal ug busa way molingi. Apan panahon sa mga emerhensiya, sama sa blackout gahapon, silay makasalbar sa mga pinuy-anan ug mga industriya gikan sa kahasol sa ka way kuryente. Bantay lang kay posibleng mas dako ang atong bayranan sa kuryente tungod sa pila ka oras nga nakapahimus ta sa alternatibo nilang suplay. Kinsay nag-ingon nga libre ang kasayon nga gitanyag sa bag-ong mga teknolohiya?  [email protected]