Daghang drayber sa mga kulurom nga sakyanan nga namasahero bisan og walay pagtugot sa Land Transportation Franchising and Regulatory Board (LTFRB) gipangdakop sa mga traffic enforcers diha’ng miagi sila sa South Road Properties.
Giaksyonan g’yud sa mga traffic enforcers ang reklamo kabahin sa mga sakyanan nga namasahero gikan diha dapit sa Compania Maritima building duol sa Cebu City Hall paingon sa Talisay agi sa SRP.
Makuyaw ang pagpamasahero nga walay prangkisa sa LTFRB kay ang mga pasahero dili mabayran sa insurance sa sakyanan kun makasugat kini og aksidente. Ang gihimo sa mga traffic enforcers mao ang pagsiguro sa kaluwasan sa mga pasahero ug dili ang pagsakripisyo kanila.
Apan bisan og gipangdakop sa mga traffic enforcers ang nahisgutan nga mga draybers, wala kaayo sila mahadlok kay gamay ra nga multa ang ilang atubangon sanglit gibase ra sa ordinansa ang ilang kalapasan.
Walay mga Temporary Operators Permit (TOP) ang mga traffic enforcers dinhi sa dakbayan kay ang hepe sa LTO sa tibuok nasud nag-ukon-ukon pag-isyu og TOP bisan sa ilang mga sakop.
Traffic Citation Ticket ra ang giisyu sa mga traffic enforcers ug gi-charge lang ang mga drayber og overloading kay wala man sila’y TOP nga magamit aron kalapasan sa kulurom ang ilang ipahamtang.
Base sa bag-o nga lagda, P120 mil ang multa kun ang usa ka passenger jeepney o kaha Van masakpan nga mamasahero nga walay prangkisa gikan sa kagamhanan nga iisyu sa LTFRB.
Ang mga traffic enforcer daku og tinguha nga mapatuman ang balaod, apan ang LTO maoy nagmika sa ilang katungdanan.