EDITORYAL – Anomaliya sa LTO

Maisip nga “eye opener” sa kadagkoan sa Office of the Ombudsman-Visayas ang reklamo sa kawani mismo sa Land Transportation Office nga adunay ilang mga opisyal nga nagpadato sa ilang kaugalingon pinaagi sa pagpangilkil sa mga kliyente nga mo-transact og business sa LTO.

Dugay na kaayo kini’ng tabi-tabi nga ang mga kawani sa LTO nalakip sa labing corrupt sa mga nagtrabaho sa kagamhanan, apan wala la’y isog nga mobarug. Kini maoy rason nga daghan kaayo ang gusto nga makasulod diha sa mao nga ahensya sa kagamhanan.

Karon nga may kawani na g’yud sa LTO nga maoy mipasaka og reklamo sa pagdawat og kinilkilan nga salapi batok mismo sa labing taas nga opisyal sa ilang ahensiya dinhi sa Central Visayas ug sa duha pa ka department heads, angay kini’ng atimanon dayon sa Ombudsman.

Pinaagi sa pag-atiman sa Ombudsman sa mao nga kaso mahatagan usab og higayon ang mga hingtungdan nga opisyal sa LTO nga kun dili man tinuod ang pasangil, malimpyohan ang ilang mga ngalan kay sigurado nga ikauwaw kini sa ilang pamilya.

Ang mireklamo nga si Carmencita Caballes miingon nga gisugo siya sa iyang mga labaw nga manguwarta, apan wala g’yud niya gidetalyi pag-ayo kun unsaon, aron nga makatigum kini og P5,000 kada adlaw.

Kaniadto gitaktak usab sa Ombudsman ang kanhi LTO-7 regional direktor tungod sa anomaloso nga kalihukan nga naglambigit gihapon og pagpangawkaw. Ang LTO dili maglagyo ug ang mga opisina sa Bureau of Customs (BOC), Bureau of Internal Revenue (BIR) nga anaa gayud ang anomaliya.

Ang mahinungdanon mao nga adunay moreklamo batok sa mga hingtungdan nga giingong nakahimo og pagpangawkaw nga ipaagi gayud sa pormal nga kaso sama sa gihimo ni Caballes.