Lahutay ni Binay
Sa mga nabalaka nga si Bise Presidente Jejomar Binay ang mobanos sa Malakanyang sa 2016 ug busa nangandoy nga magguba ang iyang kandidatura sa sunudsunod nga pagpagawas sa mga pasangil sa kahiwian batok niya, duna koy daotang balita: Dako ang kahigayonan nga modaog si Binay kun ang lahutay ug kakugihan sa iyang kampanya ang basehan.
Ni-cover mi sa mass wedding sa 227 ka magtiayon sa PAG-IBIG sa niaging semana nga gitambongan ni Binay. Gawas nga gitiwas ni Binay ang tibuok kasaulogan sa kasal nga giduma ni Mandaue City Mayor Jonas Cortes nanglamano pa siya sa venue, ang J Centre Mall, bisan nakabiya nang kasagaran sa mga kinasal ug mga sakop sa media.
* * *
Ang talagsaong lahutay ni Binay sa pagpangampanya karibalan lang ni Cebu City Mayor Mike Rama. Kinsa gihulagway sa iyang mga kaubang kandidato nga maoy kataposang nipauli gikan sa mga pulong-pulong sa kabaranggayan nga kasagaran nakadlawonan apan siya say labing unang manumbay pagka sunod adlaw aron manglamano.
Samtang puno sa diskurso ug kanta ang kampanya ni Rama, hilom ang kang Binay. Gilamano ang tanang nalabyan nga shoppers sa mall. Bisan di unta magpaletrato ang posibleng botante, tungod tingali sa kaikog o ka way camera, nagpaletrato si Binay nilang tanan uban sa opisyal niyang maniniyot. Pagkakita sa uban nga sayon diay pagduol ug pagpaletrato, nidugok dayon maong dugay kaayong nag-ukang.
* * *
Dihang gitunol ni Binay ang hinabang sa mga biyuda sa nangamatay’ng SAF commandos nga silang PO1 Romeo Cempron ug PO1 Windel Candano, nahibung na lang ang iyang mga guwardiya nga gibunlotan sa rosaryohan nilang pulseras nga gipanghatag nilang Christine ug Michelle ug sa babayeng mga kawani sa PAG-IBIG.
Nakasabot na sab ko nganong pulos dagko og bulsa ang iyang mga guwardiya. Puno diay sa candies nga iyang gipanghatag sa niduol nga mga bata. Gawas sa lamano ug selfie, gipakapinan pa gyong Binay og hawok sa aping, labi na sa senior citizens.
* * *
May laing alas si Binay: Tan-awon niya sa mata ang iyang gilamano o gikasulti. Nakat-onan ni niya gikan ni anhing Presidente Cory Aquino uban sa laing politiko nga kadungan niya sa Makati, si kanhi kongresista ug presidential spokesman Teddy Boy Locsin.
Wa hinuon ning katabang sa mga nanambong sa iyang press conference samtang nangaon ang mga kinasal. Nalubong ang hinay niyang tingog sa naandan nga kagahob sa mall. Ang mga nagsalig sa ilang mikropono nga makatabang nila pagsabot sa iyang mga gipanulti naglisod pagsabot sa pipila ka bahin. Kay naghagawhaw nang daan nilingi pa gyod ug nitan-aw sa mata sa reporter nga nangutana niya. May nasabtan man o wa, nagpaletrato ang hapit tanang reporters uban ni Binay human sa presscon.
- Latest
