EDITORYAL - Nag-upload yawe kinsay nagpusil

Ngano man g’yud pirme mang lubagon sa tawo ang kamatuoran bisan klaro na kaayo pangitaan g’yud og lusot? Samtang tinuod kinahanglan pa nga ma-beripika ang viral video sa pagpatay sa mga sakop sa PNP-Special Action Force apan di siguro husto nga moingon pangdaot ra kadto.

Mao kini ang usa sa obserbasyon kang Moro Islamic Liberation Front negotiator Mohaqher Iqbal dihang wa niya direktang gitubag ang pangutana sa Senate inquiry kabahin sa brutal nga pagpatay (gipangtiwasan) sa pipila ka mga sakop sa polis.

Ang tubag ni Iqbal, basin hinimo-himo lang kini nga video aron mangdaot, kinsa man kahay iyang gipasabot nga dauton?

Tungod ba kaha kadto sa gibati usab niyang kalagot sa gipanghimo niadtong mga tawo ngadto sa mga polis o tungod ba kaha kadto sa kalagot nga basin sa maong video masakpan kun si kinsa sa mga MILF ang promotor sa maong video.

Husto na unta ‘tong  iyang tubag nga mas maayong paabuton ang resulta sa imbestigasyon aron pagtino kun si kinsa ang maong mga tawo, apan duna pa man siya’y daghang palusot mao nga makaduda hinuon ang iyang sakto na untang tubag.

Diha sa video klaro kaayo bisan sa tonada pa lang nga mga Maguindanaon ang sinultihan sa maong mga kalalakin-an ug imposible na kaayo kun taga lain silang lungsod kay walay mangursonada og adto sa lugar nga nagpadayon pa ang buto-buto sa armas kung wa silay labot sa engkwentro.

Dako ang posibilidad nga residente sila sa Tokanalipao, ang barangay diin nahitabo ang engkwentro niadtong Enero 25.

Aniay panawagan alang sa mga awtoridad, pangitaon ug sikupon ‘gyud kadtong tawong nag-upload sa maong video sa YouTube, kay ang nag-upload niini siguradong mao usab ang namusil ug nanguha sa mga gamit sa mga polis.