Nahingangha si Senador Bongbong Marcos sa “tenor” sa sulat ni Moro Islamic Liberation Front peace panel chairman Mohagher Iqbal nga gibasa atol sa Senate hearing kagahapon. Nakapangutana si Marcos unsa ipasabot ni Iqbal sa iyang pag-ingon nga ang MILF magpabiling usa ka “rebolusyonaryong kalihukan” hangtod dili mapatuman sa hingpit ang peace agreement.
Unsa may nasabutan? Siyempre, ang Bangsamoro Basic Law.
Dili ko ganahan mohusga kang Iqbal mentras wala pa siya makapasabot unsay buot niyang ipasabot sa iyang suwat ngadto sa Senado.
Apan sa kasamtangan, nakapakpak ko sa akong mga kamot pagkasayod nga gisuspenso una sa mga magbabalaod ang hearing alang sa BBL.
Wala pa gani mapirmahi ang BBL, daghan na kaayo og mga “bangag” nga atong nalili-an.
Ang BBL magsilbe nga balaod alang sa mga Muslim sa Mindanao. Ubos unya niini, adunay kaugalingong Bangsamoro Armed Forces ug Bangsamoro Police. Unsaon na man lang ang mga Kristiyano ug uban pang dili Muslim nga anaa sa Mindanao?
Kalapasan sa kaugalingnan (sovereignty) sa Pilipinas ang mamahimong BBL. Ilabi na nga ubos sa atong 1987 nga Konstitusyon, usa kita ka nasud nga adunay usa ka Armadong Kusog ug Philippine National Police. Wala itugot ang Bangsamoro military o Bangsamoro Police.
Si Kongresista Rufus Rodriguez sa Cagayan de Oro nakapangutana “...after what happened, if our policemen are dying even if they (MILF members) are not yet in the government, how much more if we give the entire government in the Bangsamoro area to the MILF?”
Ang gikuyawan ni Bongbong nga kun hatagan sila og higayon nga mobarog ug makatukod og kaugalingong Bangsamoro military ug Bangsamoro police, basin og makig-away na hinuon ang MILF ug ilang Bangsamoro armed forces batok sa gobiyerno sa Pilipinas.
Wala ko makabasa sa BBL, apan nagtuo ko nga anti-Philippines ug pro-Bangsamoro ra ang pagkapanday niini. Dili kita makapaabot nga mopabor sa Pilipinas tungod kay ang mga negotiator habig sa Government of the Philippines silang Miriam Coronel Ferrer ug Teresita Quintos-Deles pulos mga sakop sa academe ug walay alamag sa “military value” sa sabotsabot. Ang ilang kaatubang sama nilang Iqbal ug ang mismo sa MILF nga si Ebrahim Al Haj Murad pulos mga military tacticians.
Kun may military strategist lang sa government panel, hayan dili makalamang ang MILF.
Subo lang palandungon nga ang kinabuhi sa 44 ka bagitong commando sa Special Action Force maoy nahimong bayani sa mga Pilipino aron mahigmata kita sa makuyaw nga plano sa MILF – plano nga makapahimong makaluluoy sa atong mga igsuon, ig-agaw, uyoan, iyaan ug mga higalang Kristiyano didto sa Mindanao.