Nabantang sa ikaduhang adlaw sa imbestigasyon sa Senado sa engkuwentro sa Mamasapano, Maguindanao nga nakamugna og kalibog ang kasuod ni Presidente Noynoy Aquino sa kanhi hepe sa Philippine National Police (PNP) nga si Direktor Heneral Alan Purisima. Kinsa padayong naghupot og papel sa operasyon pagdakop nilang Zulkifli bin Hir alyas Marwan ug Basit Usman bisan gisuspenso na sa Ombudsman niadtong Disyembre.
Usa sa mga naglibog mao ang nangu sa operasyon nga si Direktor Getulio Napeñas, ang girelibohang hepe sa Special Action Force (SAF). Kinsa nikumpisal nga gisupak niya ang sugo ni Aquino sa pakiglambigit sa Armed Forces of the Philippines (AFP) tungod sa sukwahi nga sulti ni Purisima.
* * *
Ang pag-insistir ni Purisima nga wa siya’y papel sa operasyon ug ang pasalig ni Aquino nga way labot si Purisima sa operasyon human nasuspenso niadtong Disyembre 4 gisukwahi sa mosunod:
Ang mga tigom pagtuki sa operasyon gihimo sa White House sa Kampo Crame, ang pinuy-anan ni Purisima nga wa niya biyai bisan suspendido na;
Niadtong Enero 9, gida ni Purisima si Napeñas ngadto sa Bahay Pangarap sa Malakanyang aron pagpahibawo ni Aquino sa Operation Exodus, human sa tigom giingnan ni Purisima si Napeñas nga siya’y bahala ni AFP Chief Gregorio Pio Catapang; ug
Si Purisima ang nag-text ni Napeñas niadtong Enero 19 nga ipadayon ang operasyon bisan unsang adlawa gikan sa Enero 23-26.
* * *
Sa iyang labing unang pamahayag human sa engkuwentro, giangkon ni Napeñas ang responsibilidad sa wa pagpahibawo sa militar. Apan human sa duha ka adlaw nga pagsukitsukit sa mga senador nabantang nga si Purisima ang naka-influencia niya.
Matud ni Napeñas gipakaingon niya nga nakahibawo ang presidente sa pasalig ni Purisima nga siya’y mopahibawo ni Catapang. Mahimong ang kasuod ni Purisima kang Aquino mao say nakapakumbinser ni Napeñas pagtuman sa tugon ni Purisima paglaktaw sa bag-ong hepe sa PNP nga si Deputy Director General Leonardo Espina ug Interior Secretary Mar Roxas.
* * *
Ikapasabot ni Aquino ang pagsalig niyang Purisima kay siya ang nag-umol sa plano. Tungod sa kakuti sa mga detalye ug sa kaduol na sa operasyon, mahimong nahukman niyang apiki nang pagbalhin sa pagduma ngadto ni Espina. Posible gani nga maoy hinungdan nga nikisikisi si Purisima ug tak-om si Aquino sa kalit niyang pagkasuspenso.
Apan nahibawo ba si Aquino sa wa pang trahedya nga si Purisima mismo ang nidasig ni Napeñas sa pagsupak sa iyang sugo pakiglambigit sa militar ug sa pagbuta nilang Espina ug Roxas nga natakda nang posibleng mga adlaw sa operasyon? Tungod sa labihang kasuko nga gisupak ang iyang sugo, mahimong uwahi na sang nahibawo si Aquino. Nga mahimong maoy nakapugos niya, bisan sa kalawom sa ilang panaghigalaay o aron ba lang pagpahungaw sa krisis, pagtaktak ni Purisima.