EDITORYAL - Pulos lang putak
Nagapos ang Pilipinas sa gipanaad niini sa international community lakip sa mga nasud nga nanag-ilog sa mga isla ug coral reefs sa West Philippine Sea. Sa pag-ulbo sa tensyon sa West Philippine Sea, misaad ang nanglabay nga mga administrasyon nga dili mohimo og mga lakang ang gobiyerno nga makapausab sa status quo sa maong kadagatan.
Kini aron pagpakita og respeto sa ubang mga nasud samtang gipaabot nga dunay mahitabong kompromiso tali sa mga nanag-ilog nga mga nasud.
Ang maong mga nasud nga kailog sa Pilipinas mao ang Vietnam, Malaysia , Brunei,Taiwan ug karon miapil ang China.
Gawas lang sa China, nagkasinabtanay ra ang lima ug way bayolenteng mga nahitabo, apan sa tanan, bugtong ang Pilipinas lang ang wala mopalambo sa mga giokupar niining isla.
Nanglabaw ang mga tagsatagsa ka Exclusive Economic Zones sa upat ka mga nasud, samtang ang China ug Taiwan basta lang nangangkon og mga teritoryo sa WPS. Kay lagi duna kunohay “usa ka estorya” ang Pilipinas, gibarogan kini sa nangaging mga gobiyerno. Dili mohimo og mga lakang sa WPS nga ikasuko sa ubang claimants.
Apan naunsa na man ni karon, ang China nga wala’y islang naabtan sa WPS mao na man hinuoy dunay lapad karon nga mga isla nga ilang gi-develop.
Way nahimo ang Pilipinas pagsilot sa China dihang ilang gipangdaro ang mga coral reefs aron paghimo og ilang isla. Atoa man kaha ning mga lugara?
Nganong dili man mohimo og pisikal nga aksyon pagpatuman sa balaod ang gobiyerno?
Nailad ang Pilipinas sa paghilom-hilom sa ubang mga nasud samtang nagsige kini og putak-putak. Kay ang ubang claimants nagsige na og develop sa mga lugar. Wa ba kaha magapos sa kaugalingong pisi ang Pilipinas sa baruganan niini kabahin sa isyu sa WPS?
- Latest
