Male apan Female ang anaa sa birth certificate

Dear Atty. Divine,

Duna ko’y pangutana may labot sa birth certificate sa akong anak. Nasayop man gud ang gibutang sa iyang gender, kay imbes “male” ang nabutang “female.” Sa akong nahibaw-an nga adunay balaud nga dili na moagi sa korte ang pag-usab niini. Unsa may among buhaton aron kini mausab ug pila man ‘sab kaha ang magasto niini? - Lita

Dear Lita,

 Mas dali ra karon ang proseso sa pag-usab sa nasayop nga entry sa gender sa birth certificate sa imong anak kay dili na man kini moagi pa sa korte. Ang imong buhaton karon mao ang pagduol sa Local Civil Registrar diin marehistro ang imong anak ug mo-file ka og Petition alang sa pag-usab sa nasayop nga entry sa iyang birth certificate. Duna ni mga dokumento nga ipa-submit uban sa imong Petition busa mas maayo nga mangayo ka daan og listahan sa mga requirements gikan sa Local Civil Registrar. Kun menor de-edad ang imong anak, ikaw ang magsilbi’ng Petitioner niini ug kinahanglan nga notaryado ni sa abogado ang Petition. Ang filing fee sa pagkurihir niini moabot sa P3 mil ug wala pay labot ang gastohan sa publication. Mas maayo nga usbon nimo daan ang iyang birth certificate samtang sayo pa aron sa higayon nga mokuha siya og mga board exams dili siya maproblema niini. - Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.