Sa una nga higayon sulod sa kapin sa 30 ka tuig, dumalahon og usa ka babaye ang Cebu Association of Media Practitioners (CAMP) Inc.
Usa ka maanyag ug buotan nga anak ni anhing Vice Governor Greg Sanchez, kaliwat nga Tuburanon sa northwestern part ni’ng lalawigan.
Siya si Cebu Provincial Board Member Gigi Sanchez, lantip ang pangutok ug angay g’yud kawid-an ni kinsa mang binuhat nga may katungod pa’ng mahigugma.
Sa piniliay nga gipahigayon niadto’ng Sabado, Enero 24, napili sa tanan si PB Sanchez nga maoy modumala niini’ng kapunongan sa mga magsisibya sa radio ug maglilindog sa pamantalaan sa Cebu.
Kauban niya nga napili mao si Executive Vice Pres. Jess Villarba, Vice Pres. for print Cesar Albor, Vice Pres. for radio Efren Lonzon, Vice Pres. for TV Danny Cogtas.
Secretary Richard Alfajora, Treasurer Edgar Alcover, Auditor Dr. Mike Nuñez, Mass Media Officer Loy Jurado, Members of the Board: Congressman Bebot Abellanosa, Max Andrino, George Dela Peña, Louie Reyes, Ely Camomot, ug Zac Aragon.
Gisaksihan ang maong piniliay ni CAMP Pres. Emeritus, Engr. Greg Senining.
Matag tuig magpili ang CAMP og mga bag-ong opisyal ug nagtuo ang tanan nga pinaagi sa pagdumala karon ni PB Sanchez, daghan ang mga kalihukan sa maong kapunongan, sama sa paghatag og scholarship sa mga anak sa piniling sakop sa media.
Ang CAMP adunay 30 ka scholar nga motungha sa Asian College of Technology (ACT) inigbukas sa klase karong Hunyo.
* * *