Gisaway og maayo ang buhatan sa Department of Social Welfare and Development ug mismo ang gobiyerno kay gipanagoan niini ang mga kabus ug ang mga libud-suroy nga kabataan nga sagad nagpuyo sa kadalanan sa Metro Manila atol sa pagduaw ni Pope Francis sa nasud.
Si DSWD Secretary Dinky Soliman miklaro nga kabahin kadto sa Conditional Cash Transfer Program sa gobiyerno alang sa mga kabus nga banay nga walay ikasarang bisan na lang og kapuy-an.
Ang mga libudsuroy gidala sa usa ka mahalon nga resort gawas sa Metro Manila alang sa ‘family bonding’ ug uban pa’ng kalihukan nga kuno kabahin sa programa sa DSWD, ug gipapauli human sa pagbiya na sa nasud ni Pope Francis.
Apan ang nagkadaiyang pundok nga nangangkong mga pro-poor ug naluoy kunohay sa mga kabus mipasangil nga nagpapogi lang ang gobiyerno sa mata sa Santo Papa ug sa mga bisita’ng mangabot.
Lakip sa mga misaway mao ang mga elected officials nga hilas kaayo’ng paminawon ug grabe’ng nakasaway sa gihimo sa DSWD.
Wa nila hunahunaa nga ang ilang gisaway mao ang ilang kaugalingon ug ang tibuok katawhang Pilipinhon ug ang sistema’ng nagpalihok niini. Ngano kun sila’y naa sa puwesto may mahimo ba sila? Kini’ng mga nanaway may nahimo ba sa mga kabus?
Sa pag-abot sa Santo Papa, ang mga ambisyoso ug mga hakog og posisyon sa gobiyerno nag-iyahay lang og pangandam ug paghimo’g mga lakang aron makasakay sila sa panahon, aron sila matiman-an sa 2016 elections.
Samtang tinuod makapaduda ang tayming niini ug daw gitagoan g’yud gikan sa mga mata sa Santo Papa ang tinud-anay nga dagway sa nasud karon, apan sama lang kini sa usa ka balay, kun duna kay bisita natural manghipos g’yud ka sa bati nga talan-awon.