Matud pa, ang atong luha makapalimpyo sa atong konsensiya, kay gihugasan man sa luha pinaagi sa tumang pagbasul o pag-ila o pag-angkon sa kasaypanan.
Sa laing bahin usab, gituohan nga kining luha, maoy pagpagawas sa giluom nga pagbati diha sa kasakit ug kalipay. Sagad kining masinati nato.
Sa siyensya, sa mga sayantista nga eksperto aning bahina, kita gipasabot nga ang luha adunay duha(2) ka klase, nga gitin-aw sab nato ang paghan-ay:
*Ang ginganlan og ‘Constant Tear’ – luha kini nga nahimo o naumol nga may tubig, lana ug ‘mucos’.
Ang kanunay pagprodyus o paghilak niini, ang luha maoy magsilbing lubrikante nga molimpyo batok sa iritasyon ug anti-bayotik nga panagang batok sa impeksyon sa atong mga mata.
* Ang ginganlan og ‘Reflex Tear’–luha kini gumikan sa iritasyon sa hangin, subra nasulawan sa kahayag sa suga o sa adlaw.
Mao nga kahilakon permi nga namula ang mga mata nga hapdos tungod sa iritasyon.
Apil na niini ang luha gumikan sa subrang nabun-og sa pagtutok o hago ang mata (eye stress).
Busa, ampingan nga kanunay himsog ang atong panan-aw pinaagi sa paghatag og sustansya alang sa mata, sama sa ‘Lutein’ nga makuha gikan sa mga pagkaon og natural nga prutas ug utanon.
Ang kanunay kulang sa tulog, mag-ughan sa luha kay init ang mata mo, nga nahutdan sa lubrikasyon ug antibayotik nga luha. Sagad ra ba sa matang way luha, dili na kaayo makakita.