Gusto’ng mo-resign dayon sa trabaho

Dear Atty. Divine,

Nagplano ko nga mo-resign sa trabaho kay nagsakit ang akong nanay ug way makaatiman kaniya. Apan wa mosugot ang akong manager kay kuno mangita pa sila og ipuli nako ug matud niya base sa balaod kinahanglan nga hatagan daw nako og 30 ka adlaw nga notice ang employer sa dili pa ko mopahawa. Obligado ba g’yud ko nga motuman sa 30 ka adlaw una ko maka-resign attorney? Unsa may angay nako nga buhaton? -Julie

 

Dear Julie,

Base sa Labor Code, kun ang empleyado moboluntaryo pag-resign kinahanglan siya nga mohatag og 30-day notice sa iyang employer aron ‘sab makapangita kini og ipuli kaniya ang management ug dili maapektohan ang ilang operasyon ilabi na kun importante kaayo ang katungdanan nga iyang gikuptan sa kompaniya. Hinuon dunay ubang employer nga motugot lang sa iyang empleyado nga mo-resign dayon ug di na kinahanglan nga paabuton pa ang 30 ka adlaw. Ang 30-day notice duna say exemption. Kun pananglit nakasinati og pagpangabuso sa employer ang kawani, then dili na siya kinahanglan nga mananghid pa sa iyang pag-resign. Ang maayo nimo’ng buhaton karon mao ang paghangyo sa imong employer nga tugotan ka’ng maka-resign dayon tungod sa sitwasyon sa imong inahan. Mas maayo man gud nga mobiya ka sa kompaniya sa husto nga paagi aron dili madaut ang imong employment record.Thanks and God bless. - Atty. Divine

 

Show comments