Dako g’yud kaayo ang akong pagpasalamat ni higala’ng Sammy Dasoc kay gihatagan ko niya og gold plated nga gamay’ng imahen ni Señor Santo Niño nga kanunay g’yud nako nga gidala-dala sa tanan nga higayon.
Nasayud man gud si bai Sammy nga idolo g’yud nako si Santo Niño mao nga gihatagan ko niya sa mao nga “cute” kaayo nga imahen sa Gamhanang Bata isip pinaskohan kaniadto’ng 2013.
Daghan kaayo nga kaayohan nga akong nadawat gikan sa pagkadawat ko sa mao nga imahen. Dili g’yud ko makalimot ni bai Sammy kay iya usab nga tahas ang paghatag sa susama nga imahen sa mga matan-aw niya nga tinuod gayud nga nagmahal ni Santo Niño.
Tambag lang nako niadto’ng gusto moangkon, ayaw kini pangayoa. Ayaw ‘sab pagpalit. Mas labing maayo nga adunay mohatag kanimo. Bisan ako andam ko nga mohatag kun makita nako nga tinuod gayud kini nga deboto ni Santo Niño.
Kun duna ko’y panginahanglan, iampo nako ug gihatag g’yud sa Santo Niño.
* * *
Gawas sa pagluwas ni Santo Niño kanako diha nga naligsan ko sa prime mover nga truck didto sa Catmon unya wala maunsa kaniadto’ng Hunyo 25, 1995, daghan pa siya og gitabang kanako.
Pobre kaayo ko, gani pagka karon nagpuyo ko sa squatters area sa usa ka bahin dinhi sa siyudad. Dili g’yud dako ang akong suweldo ug mao man gani ang rason nga madungog ko ninyo sa radyo ug nagtrabaho sa mantalaan.
Lisud kaayo kun wala ka’y sakyanan. Giampo nako nga tabangan unta ko ni Santo Niño nga maka-awto. Gubaon na ang karaan nako nga Ford Cortina nga gipalit lang og P45 mil.
Wala na nako gamita kay basin og maabereya, mapun-an ang akong problema. Sa laktud, nangita ko’g arang-arang nga awto, apan ang problema wala’y kuwarta.
Nagtuo ko nga si Santo Niño g’yud ang nagtabang. Dunay miadto sa balay ug nagpahibalo nga may ibaligya nga awto nga barato kaayo. Tinuod, barato ra, apan wala ko mohangyo kay wala man ko’y kuwarta.
Apan ang barato nga presyo, gipakubsan pa g’yud sa tag-iya nga mora na lang og “dala’ng hatag.” Apan bisan pa niini, wala g’yud ko’y kuwarta.
Puwerte nako’ng ampo nga tabangan ko ni Santo Niño nga makakita’g kuwarta. Usa nako ka higala, nagpahuwam og kuwarta nga gidugang nako sa akong “loan” sa coop.
Sa laktod, napalit g’yud nako ang awto pinaagi sa pagtabang ni Santo Niño. Salamat Santo Niño!!!!