Ang paggahin ug pagtigum sa imong inadlaw o binulan nga kinitaan, sama ra nga nagbayad ka og inadlaw o binulan sa inutang nimong butang.
Sagad, tungod sa kaibog ug kahinam o obsesyon sa buot dayon angkonon ang usa ka butang, nahaylo sa patinga o gamay kantidad nga downpayment, mapuslan na nimo kini.
Barato ra unta apan momahal ang butang, nga tungod sa ipatong nga tubo o interest, sud sa 3 ka tuig nga pagbayad madoble na ang kantidad.
Usa kini ka sekreto nga dili tinago, lamang wa kita magtagad niini kun unsaon ang maayong pagdumala sa atong daginuton nga kinitaan. Usahay basulon pa nato ang gamay nga kita, nga kuno maoy hinungdan sa kaapiki kanunay sa iyang sitwasyon, nga ingon sa permi kulangon sa panginahanglan.
Angay kita mahibalo, dato man o pobre pulos kana problemado sa utang. Ang nakalahi lang sa dato, ang inutang gipalambo nga ang tubo maoy ibayad sa utang. Samtang sa pobre, mangutang aron ibayad sa mga tubo nga wala kabayring mga inutang nga butang nga maisip nga gasto, nga wala inegosyo.
Busa atong usbon o balit-aron ang atong diskarte sa pagpangutang. Imbis mangutang ta nga maoy mobayad sa tubo o interest, kita na maoy mokubra sa tubo ini, kun mobayad kita karon sa utang nato sa palaaboton. Imposible ba? Seguro ko makahimo ka ini. Pugsa ug disiplinaha lamang ang kaugalingon.
Magplano ka. Isipa nga may utang ka sa banko. Muadto kang modeposito kada bulan kunohay sa pagbayad sa umalabot nga utang. Kada tuig ibalhin mo sa time deposit, sud sa 3 ka tuig, malipay kang milambo ang imong kinitaan. May pundo kang perming nagtubo, nga maoy imong ganansya sa pagtigum.