Nipuyo nga wala mananghid

Dear Atty. Divine,

Dunay yuta ang akong iyaan nga anaa mahimutang sa usa ka commercial area ug duna ‘sab kini building nga maoy gipuy-an sa akong iyaan kaniadto apan tungod sa ka tiguwang na niya mikuyog siya sa usa ka suod niya’ng pamilya nga mipasalig nga maoy moatiman kaniya. Tulo ka tuig na nga nabiyaan sa akong iyaan ang maong pinuy-anan apan karon iyang nasayran nga gipuy-an na ang balay sa usa ka inpluwensyado nga tawo nga way pagtugot ug wala ‘sab gani kini mag-abang kaniya. Gipapahawa na sa akong iyaan ang nag-ukopar sa iyang balay kay iya na’ng gamiton ang property apan nagdumili kini. Unsay angay namo’ng buhaton? Mahimo ba nga ako maoy makig-atubang sa nag-ukopar niini kay tiguwang na man gud kaayo ang akong iyaan?-Joey

Dear Joey,

Ang una ninyo’ng buhaton mao ang pagpahimo og Special Power of Attorney nga pirmahan sa imong iyaan aron ikaw maoy morepresentar kaniya sa pagpakig-negotiate sa nag-ukopar sa iyang property. Kun aduna ka nay SPA, ang sunod nimong buhaton mao ang pagpadala og Notice to Vacate sa nagpuyo niini. Kun dili siya motuman, ang sunod ninyo’ng buhaton mao ang pagreklamo kaniya sa Barangay ug kun dili gihapon siya mopahawa, ang katapusan nimo’ng option mao ang pagdangop sa korte pinaagi sa pagpasaka og Ejectment case aron ang korte na ang mopapahawa kaniya.Thanks and Pit Senyor! -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.