EDITORYAL - Maayong pagsaulog sa Fiesta Señor!

Dili gayud ikalimod ang kainit sa debosyon sa mga Sugbuanon ug mga deboto nga gikan pa sa nagkalainlaing lugar kang Señor Santo Niño. Sukad sa pagsugod sa nobenaryo niadtong miaging semana, wala gyu'y hubas-hubas ang tawo sa Basilica Minore del Sto. Niño bisan pa og pipila ka misa ang gipahigayon kada-adlaw. Gani, moawas ang mga manimbahay sa dalan tungod sa kadaghan.

Nganong ingon ana na man lang kahugot ang debosyon sa mga tawo kang Sto. Niño? Matud pa sa mga deboto nga nahinabi sa Banat News, apil na ang mga na interview sa igsoong mantalaan nga The Freeman, mainiton kaayo ang ilang pagtuo sa Balaang Bata tungod kay Siya maoy ilang dalangpan sa tanang mga kalisod sa kinabuhi. Ug, matud pa sa mga deboto, wala gayud sila biya-i sa Sto. Niño sa mga oras nga nagkinahanglan sila Niya.

Susama sa mga niaging pagsaulog sa Fiesta Señor, daghan pud ang magsige'g saway nga ang kapistahan nahimo nang commercial ug ang ubang tawo, gigamit na kini nga negosyo ug excuse aron maghubog-hubog, o magkiat. Gani naa gyu'y mga tawo nga magsige og pahinumdom nga ang kapistahan sa Señor, dili lang ang pagsayaw sa kadalanan, kun dili ang pagsimba o pagsalmot usab sa mga religious activities.

Apan kung basehan nato ang kabaga sa mga manimbahay kada adlaw sukad pa sa pagsugod sa nobenaryo sa Basilica, dili na angay'ng ikabalaka kung nakahinumdum ba ang katawhan sa katuyuan sa pista.

Ang kadaghanon sa tawo nga nisalmot sa mga religious activities, sugod sa Walk with Jesus hangtud na sa prosesyon nagpaila nga nag-una gayud sa kasingkasing sa mga deboto ang pagpasidungog kang Sto. Niño karong iyang kapistahan.

Pit Señor!