Panaglalis tali sa pasahero ug drayber sa PUJ misulbong niadto’ng unang adlaw sa pagpatuman sa P7 nga bag-ong minimum nga pletehan sa passenger jeepney.
Usa ra ang hinungdan, dili gusto’ng mohunong sa pagpanulis og 50 sentimos sa matag pasahero ang mga drayber sa PUJ.
Ang LTFRB mitugot og P7.50 nga minimum nga pletehan sa PUJ niadto’ng higayon nga ang presyo sa gasolina ug krudo miabot pa og P52 matag litro.
Apan nakapanulis sa atubang ang mga driver kay dili sila mosukli kay kuno walay sensiyo nga 50 sentimos.
Ang LTFRB maoy nagmugna og lagda aron makapanulis ang mga drayber mao nga wala na lang usab sila mokibo kay wala may mireklamo nga pasahero.
Kaniadto’ng Lunes gimando sa LTFRB nga himuon na lang P7 ang minimum nga pletehan tungod sa pagbahar sa presyo sa gasolina ug krudo. Ang mga drayber nga naanad na’g panulis, nasuko kay wala pa kuno’y taripa nga giisyu ang LTFRB.
Wala pa sila matagbaw og pagpakaon sa ilang pamilya sa ilang mga tinulis sukad niadto’ng gipatuman sa LTFRB ang P7.50 nga minimum fare.
Ang balaod, balaod g’yud. Nagtuo ang Espada nga may sipyat usab ang LTFRB sa pagpatuman og balaod bahin sa minimum nga pletehan nga bungkig.
Ang 50 o 25 sentimos lisud na kaayo karon nga makita, busa dili na angay pa’ng pasubrahan og 50 o 25 sentimos ang minimum nga pletehan.
Kay usbon ko ang balaod, balaod g’yud ug ang molapas niini, gabaan.