EDITORYAL - Badlis lamang

Nagkinahanglan pag-deploy ang kapolisan og 25 mil ka mga polis, samtang susamang gidaghanon usab ang gipadala sa militar alang sa seguridad ni Pope Francis sa lima ka adlaw niyang pagduaw dinhi sa nasud nga nagsugod kagahapong adlawa.

Ang seguridad gihimo alang sa kaluwasan sa Santo Papa gikan sa mga hulga sa kinabuhi niini ilabi na sa mga terorista. Bisan di pa isulti, ang lider sa simbahang Romano Katoliko usa ka lehitimong target sa mga Islamic terrorists.

Ang presensiya sa mga security forces ug mga barikada sa rota ug sa pahigayonan sa Santos nga Misa dili lamang aron mapakgang ang mga adunay dautang tuyo kaniya.

Seguridad kini gikan niadtong mga gahi og mga ulo ug dili magpapugong paghamag ngadto sa Pontiff.

Dili pud angay mahayan ang preparasyon sa gobiyerno tungod kay nasayod silang daan nga  duna g’yud unyay  mopaduol o mohikap kang Pope Francis.

Dako kaayo kining kalainan itandi sa 2014 World Youth Day sa nasud sa South Korea niadtong Agosto 2014.

Badlis lang sa chalk ang nagpugong sa bagang duot sa mga tawo ug sa Santo Papa, timailhan nga ingon niana ka disiplinado ang mga Koreano itandi sa mga Filipino.

Ang ilang security forces nga gi-deploy mas nakapokus sa pagbantay kontra sa mga dunay dautang tinguha sa kinabuhi sa Santo Papa, samtang ang ilang mga polis nakapokus kontra krimen sa ilang tagsatagsa ka mga lugar.

Dinhi sa Pilipinas, gibiyaan sa gibanabanang dul-an 50 mil ka polis ug sundalong gi-deploy sa Papal security ang ilang naandang gibantayan.

Mopatuo ba kaha ang mga Filipino pinaagi sa badlis lamang ?