Traffic hazard trees

Lapad na kaayo ang tumoy sa dalan M. Velez, kana’ng kilid sa Kapitolyo. Kami’ng mag-agian diha kada adlaw, lipay kaayo ... apan sa sama nga higayon, nabalaka, tungod kay ang mga kahoy nga dili ipaputol nila’ng Fr. Reyes ug sa mahigugmaon sa mga kahoy nga Livable Cebu, nakahatag og dako’ng kapilegro sa mga motorista.

Sa ato na’ng nahisgotan dinhi sa una nato’ng mga lindog, ang maong mga kahoy, nahimo na’ng obstruction sa traffic, usa na ka hazard, out of place na.

Kinahanglan putlon na. Ug ato ni nga pulihan og pagtanom og kahoy didto na sa bukid. Hinaut mokuyog nato sila si Fr. Reyes ug taga-Livable Cebu.

Nakahatag kanamo’g dako’ng inconvenience, tungod kay way klaro nga lane. Unya, hata-hataon dayon ta sa mga PUJ ug mga motorsiklo, mokalit la’g tunga sa imong kilid, dayon nga overtake.

Unsaon, wa man mahimutang sa tunga sa karsada ang mga kahoy, busa mas lapad ang pikas nga lane, sa ato pa, dili pareho ang gilapdon sa mga lane.

Ang dapit sa wala kun padulong ka sa Capitol, three lanes, apan ang sa tuo, two lanes ra.

Alang nako, nagsamoksamok lang ang mga kahoy, nawala na ang ilang katahom, ug wala na maka-serve sa purpose. They have to give way to development, ug kinahanglan atong tan-awon ang safety sa katawhan over sa atong gugma sa kakahoyan.

Let’s not be too emotional. Let’s be realistic. Kita’ng tanan nahigugma sa kinaiyahan, dili kay sila ra si Fr. Reyes ug taga-Livable Cebu. We all love trees. Dili kini ilang monopoly.

Apan, akong usbon, out of place na ang maong mga kahoy. Ang mga nananom niini, wala maglantaw sa halayong unahan, nagtuo sila nga dili molambo ang Sugbo, ug magpabiling hagip-ot ang mga dalan. Mga calesa ug mga tartanilya ra kaniadto ang mangagi.

Ang baha nga gidala ni Seniang, gikan sa bukid, dili gikan sa mga sapa. Sa ato pa, wa nay nakapugong sa tubig didto sa kabukiran. Wa nay mga kahoy. Busa, adto na ta mananom og kahoy sa kabungtoran ug kabukiran. Apan, kinsa may mananom?

Unsaon, wa man nato padayona ang tree planting ug reforestation ni Marcos ... ug kang Imelda nga green revolution, gumikan sa atong kasuko ngadto kanila. Mahimo man unta to nga masuko ta kanila, apan, gipadayon ang mga maayo nila’ng programa sama sa tree planting  ug green revolution. Di ba, Noy?