Haruhay na ang pagsayaw sa mga Sinulog dancing contingents inig-agi nila sa General Maxilom Avenue karong Domingo kay gipanguha na ang mga semento taliwala sa karsada nga nagsilbi nga road separators.
Dugay na kaayo nga angay kini himuon apan karong tuiga pa gayud gipatuman ni Mayor Michael Rama nga maoy nagdumala sa mga kalihukan sa Sinulog festival activities.
Kini maoy nagmatuod nga ang pagpangita’g paagi sa pagpahapsay sa kalihukan sa Sinulog dili kay katungdanan lang sa mayor, kun dili angay nga moapil gayud ang katawhan pinaagi sa paghatag og mga sugyot.
Kay ang mga Sinulog dancing contingents mahimo na man nga anha mosayaw taliwala sa karsada, sukwahi kaniadto nga anha ra sa usa ka bahin sa karsada tungod sa road separator, dili problema karon ang crowd control.
Dapit sa Fuente Osmeña, giguba na usab ang sementado nga center island aron sayon na lang ang pag-agi sa mga contingents. Tungod sa gihimo ni Mayor Rama, mapaabot ang usa ka mas hapsay ug menos og problema nga Sinulog grand parade unya sa Domingo.
Kinahanglan g’yud nga ang tanang katawhan magtinabangay, ipatigbabaw ang kabugnaw sa buot, dili dali nga masuko sa pagsaksi sa mga kalihukan sa Sinulog.