Pag-ampo alang sa Santo Papa

Usa ka semana gikan karon, nia na sa nasud si Pope Francis. Sa mga adlaw nga nia sa Pilipinas ang Santo Papa, mao ‘sab ang panahon sa pagbuhos sa mga pabor ug grasya kana kun basehan ang pagtuo’ng katoliko.

Tinuod, sa kadaghang nasud ug sa kadaghang katoliko sa kalibutan, dako’ng bintaha nga usa ang Pilipinas sa pipila lang ka teritoryo nga maduaw sa Santo Papa.

Giisip nga ang iyang presensiya, talagsaon ug dako’ng grasya, di’ lang isip lider sa simbahang katoliko apan isip pangu’ ‘sab sa labing gamay nga estado sa kalibutan—ang Vatican.  Hinungdan nga di’ yano ang iyang presensiya sa usa ka dapit nga iyang duawon.

Tunga-tunga sa mga preparasyon nga gihimo alang sa pag-abot sa Santo Papa, mao ang labing dako’ng hagit nga giatubang karon sa atong gobiyerno—ang seguridad sa usa sa labing impluwensyado’ng lider sa kalibutan.

Di’ sayon ang pag-abiabi sa ingon niini ka dako’ng personalidad labi na nga dili kontrolado ang huna-huna o mga plano sa mga tawo o grupo nga buot magbilin og kadaot o mosamok sa kalihukan.  Ang labing dako’ng hagit karon unsaon nga masiguro’ng luwas ang santo papa sa tanan niya’ng mga kalihukan su’d sa lima ka adlaw niya nga pag-istar dinhi sa nasud.

Kun nahimo kaniadto ang pagpusil ni St. John Paul 2 sulod mismo sa St. Peter’s Square dili imposible nga mahitabo kini pag-usab nga mas high-tech na ang panahon karon ug mas daghan ang mga organisado’ng tawo nga wa’y laing motibo gawas sa pagbilin og dautang epekto sa usa ka kalihukan.

Ug si Pope Francis nga giisip nga labing gawasnon sa iyang mga desisyon sa pakighimamat sa mga tawo ug magpaduol g’yud sa mga tawo, labing dako’ng hagit karon unsaon nga mamintinar ang iyang kaluwas bisan sa pagdumog sa mga tawo.

Ang labing dako’ng gimbuhaton kun seguridad ang hisgutan mao ang iyang misa sa Tacloban city ug ang katapusang misa sa Quirino grandstand.

Husto ang giingon ni NCRPO Chief Carmelo Valmoria nga kun buot nimo nga motabang sa seguridad sa pagduaw sa Santo Papa, dili lang magdala og mga hait nga gamit ug dili usab ibilin bisan asa ang mga bag tungod kay maghatag ni og panic o kalisang sa mga tawo ug otoridad.

Ug alang sa mga Sugbuanon ug uban pang Pinoy nga dili makahimamat personal sa Santo Papa, dako og matabang ang imong pag-ampo nga ang pagduaw sa Santo Papa  mahimo’ng hapsay ug malinawon.

Email: [email protected] or [email protected]